Blog Droed

Hynt a helynt ffan ffwtbol Cymraeg ...

Da ni lawr ...

23.4.08
... doedd hi'm yn annisgwyl yn y diwedd. Yn wir, doedd neb yn crio nac yn rhuthro i'r maes er mwyn cofleidio eu gilydd a chydymdeimlo.

Wedi 87 mlynedd o fod yn glwb cynghrair, bydd Wrecsam yn chwarae yn glwb 'non-league' y tymor nesaf.

Mae 'na ddigon o bobl efo barn - neb llai nag Ian Gwyn Hughes, ond 'di Ian ddim mam weld bai, dim ond canolbwyntio ar y tymor nesaf a'r hyn sydd angen ei wneud.

Mae un o flogwyr mwyaf toreithiog Cymru, Eric the Red, yn poeni am Wrecsam ac yn gweld bai ar gefnogwyr pêl-droed gogledd Cymru am eu diffyg cefnogaeth.

A draw ar red-passion, negesfwrdd cefnogwyr Wrecsam, mae pawb yn cael y bai - Brian Little, Brian Carey, y perchnogion, y cefnogwyr ... mae'r rhestr yn faith.

Yn bersonol, does gen i ddim llawer o ffydd yn Brian Little. Fe gafodd o ddigon o amser i sicrhau bod y clwb yn gallu troi'r gornel. Daeth a 12 chwaraewr newydd i'r clwb yn ystod mis Ionawr - ond doedd yr un ohonnyn nhw'n ddigon da.

Ac mae ei dactegau a'i ddewisiadau wedi fy nrysu yn llwyr. Nos Fawrth roedd RHAID i ni ennill os am unrhyw obaith o aros i fyny, ond mi barhaodd Little i chwarae Levi Mackin, chwaraewr mae holl gefnogwyr Wrecsam yn gwybod sydd ddim digon da - ac mi brofwyd hynny eto neithiwr.

Roedd ein prif sgoriwr, Michael Proctor, ar y fainc a phan sgoriodd Henffordd cyn yr egwyl roedd pawb yn meddwl y buasai'n dod â Proctor ymlaen ar gyfer yr ail hanner ... ond na.

Wedi i Henffordd rwydo eu hail gôl fe benderfynodd ddod â Danny Williams i'r maes ... chwaraewr canol cae ... yn lle Mackin? Naci, yn lle Connall Murtagh - y chwaraewyr gorau oedd gennym ni yng nghanol cae. Pryd ddaeth Proctor ymlaen? Efo deg munud i fynd!

Dim ond un o chwaraewyr Little oedd yn chwarae yn ystod y gemau olaf 'ma - Gavin Ward. Cafodd Phil Bolland a Simon Spender - yr unig ddau chwaraewr sydd efo gobaith o gael ei hethol yn chwaraewr y flwyddyn gan y cefnogwyr - eu gadael allan o'r garfan ar gyfer y ddwy gêm ola ... pam?

Mae hi'n mynd i fod yn hâf hir iawn ...

Labels: , ,

Be? Mae na dîm sy'n waeth na ni?

21.4.08
Dwi'n gallu ymdopi efo'r siom ... fel cefnogwr pêl-droed Cymreig mae dyn yn dod i arfer efo siom ... ond mae'r gobaith yn siwr o'n lladd i!

Os 'da ni'n llwyddo i guro Henffordd nos yfory ... ac yna'n curo Accrington Stanley ar Y Cae Ras ddydd Sadwrn ... ac mae Dagenham yn methu â churo Darlington yn Darlington ddydd Sadwrn ... mae popeth yn ddibynol ar gemau ola'r tymor!

Blimey!

Labels: , ,

Wrecsam v Celtic ... ia, Farsley Celtic

15.4.08
Ia, dim ots be ddudes i yr wythnos diwetha' am Wrecsam yn llwyddo i aros i fyny ... 'da ni i lawr - heb os!

Bues i yn Amwythig ddydd Sul ar gyfer gêm dderby Wrecsam efo Amwythig ond 'dwi'm yn siwr os oedd o'n benderfyniad doeth wedi perfformiad chwerthinllyd arall gan Y Dreigiau.

'Dwi erioed wedi gweld tîm pêl-droed yn chwarae mor sâl â chwaraeodd Wrecsam brynhawn Sul.

Roedd y gêm ar ben fel cystadleuaeth o fewn saith munud wrth i Gavin Ward a Richard Hope(less) lwyddo i wneud smonach llwyr o bas hir a chaniatau i Kevin McIntyre rwydo gôl gwbwl hawdd.

Darren Moss, â aned yn Wrecsam, gafodd yr ail ac i rwbio halen i'r briw fe rwydodd James Constable y drydedd er i Gavin Ward arbed cic wreiddiol Dave Hibbert o'r smotyn.

Roedd 'na dri neu bedwar o chwaraeyr Amwythig yn ciwio yn y cwrt cosbi i geisio rhwydo'r drydedd gôl 'na ... a chyda chefnogwyr Amwythig yn ein gwawdio, roedd yn embaras llwyr i'r 1,400 o gefnogwyr Wrecsam oedd wedi gwneud y daith draw i'r New Meadow.

Roedd Brian Little yn dweud wedi'r gêm ei fod o wedi gorfod gofyn i Joey Jones am gymorth i ladd ar y chwaraewyr:
"I was running out of words at the end and Joey - who is a great hero and friend of mine - felt the need to tell the players some things that weren't complimentary."

... roedd na 1,399 o gefnogwyr eraill fyddai wedi bod yn ddigon parod i leisio eu barn, Brian.

Prin iawn ydi'r adegau 'dwi 'di gweld cefnogwyr Wrecsam yn troi ar eu tîm i'r fath raddau y weles i ddydd Sul - 'dwi'n amau'n gryf fod Drewe Broughton wedi hyd yn oed clywed rhai o'r rhegfeydd oedd yn cael eu bloeddio, yn ôl yr olwg oedd ar ei wyneb!

Ond mae'r cefnogwyr wedi cael digon - da ni 'di bod yn y tri isaf yn Adran Dau ers yr wythnos gyntaf ym mis Medi ond er hyn 'da ni dal wedi gweld torfeydd oddeutu 4,500 ar Y Cae Ras a thorfeydd uchel iawn yn dilyn y tîm o Sadwrn i Sadwrn ar hyd a lled Lloegr.

Efallai ei fod yn rhy hwyr erbyn hyn, ond o leiaf mae'r chwaraewyr yn gwybod na fydd llawer o groeso iddyn nhhw'r tymor nesa wrth i ni herio Farsley Celtic ac Ebbsfleet.

Labels: , , ,

Da iawn K-ee-ardiff

7.4.08
Llongyfarchiadau mawr i Gaerdydd a'u cefnogwyr ar gyrraedd rownd derfynol Cwpan FA Lloegr.

Fel mae llawer o ddarllenwyr y blog yma'n gwybod, mae gen i nifer fawr o ffrindiau sy'n cefnogi'r Adar Gleision a 'dwi'n hollol 'chuffed' drostyn nhw. Fel ddudodd un ohonnyn nhw wrtha'i ddoe "Di petha' ddim yn cael llawer gwell na hyn".

'Dwi ddim am sbwylio'r foment wrth gwyno'n ormodol, ond os ga'i ofyn i SKY, BBC, ITV a holl bapurau newydd Lloegr i beidio a chymysgu llwyddiant Caerdydd efo llwyddiant i Gymru mi fyddwn i'n hapus.

"It's a great day for football fans in Wales," meddai SKY ddoe. "It's been a fantastic weekend for Welsh football," meddai rhywun ar Radio Wales bore 'ma ...

... wel, tra bo fi'n cytuno'n llwyr bod hi yn gamp enfawr i Glwb Pêl-droed Caerdydd a thra bo'u rheolwr a'r tîm yn haeddu pob clod 'di hi ddim mor wych â hynny!

'Di'r Duwiau pêl-droed ddim yn gwennu ar y gornel fach yma o Gymru ar hyn o bryd. Mae Wrecsam yn wynebu dyfodol llwm iawn yn y Conference felly tra bo fi'n hapus iawn dros fy ffrindiau sy'n cefnogi Caerdydd, plis, da chi, peidiwch a choelio bod pob cefnogwr pêl-droed Cymreig yn gwenu heddiw.

'Dwi wir yn gobeithio bydd Caerdydd yn gallu ymweld â Wembley deirgwaith wrth gyrraedd rownd derfynol y gemau ail gyfle hefyd a 'dwi hefyd yn dymuno pob lwc i Abertawe'r wythnos nesa wrth iddyn nhw geisio sicrhau dyrchafiad ... ond peidiwch a chredu bod pawb yn hapus!

Mae pêl-droed yn gallu bod yn greulon iawn.

Labels: , , , ,

'Da ni'n mynd i fod yn saff ...!

1.4.08

'Dwi ddim yn credu'r peth go iawn, ond 'dwi newydd dreulio hanner awr yn cwblhau 'predictor' y BBC a chydag un gêm yn weddill mae Wrecsam allan o safleoedd y cwymp uwchben Mansfield, Dagenham a Redbridge a Chaer!

'Dwn i ddim faint ddylwn i fod yn credu o'r petha' 'ma ... wedi'r cwbwl, 'dwi ddim wedi gallu darogan llawer o ganlyniadau y tymor yma ... ond mae'n rhaid cael gobaith o rhywle!

Mi fyddai osgoi'r cwymp tra'n gweld Caer yn disgyn yn deimlad pleserus tu hwnt ... coeliwch chi fi!

Labels: , , , , , ,

10.3.08
Dwi ddim yn cael achos i dathlu'n amal iawn y dyddiau yma, ond mae hi bob amser yn hyfryd curo Caer ac yn enwedig ar eu tomen eu hunain!

A'r hyn sydd yn gwneud y fuddugoliaeth hyd yn oed yn well yw bod y dyfarnwr wedi gwrthod gôl i Gaer eiliadau'n unig cyn i ni fynd i ben arall y cae a sgorio ... ddwywaith!

Ond mae'n rhaid gofyn y cwestiwn, pam fod angen i ni chwarae'r gêm yma am 12:00 ar brynhawn Sul?

Os yw heddlu Manceinion a Lerpwl yn gallu ymdopi efo gemau mawr am 3 o'r gloch y prynhawn, os yw West Ham v Chelsea neu Rangers v Celtic yn gallu bod ar amser call o'r dydd, pam ar y ddaear fod angen i Wrecsam v Caer fod ar adeg mor hurt ar ddydd Sul?

Dau dymor yn ôl, roedd heddlu Caer yn mynnu bod y gêm yn cael ei chwarae am hanner dydd ar brynhawn Mercher - diwrnod gwaith!!

A'r peth mwyaf hurt am hyn oll yw mai ychydig dros 3,000 oedd yno ac wedi'r gêm, cerddodd y ddau set o gefnogwyr i lawr Bumpers Lane tuag at eu ceir efo'u gilydd heb yr un heddwas i'w weld yn unrhywle! Roedd tua 40 o Robocops Heddlu Gogledd Cymru a dau llond bws mini o heddlu Caer yn gwarchod llond dwrn o gefnogwyr Wrecsam mewn capiau Burberry a chotiau SI ...

... hurt!

Labels: , , , ,

Canlyniad bendigedig!

3.2.08
Y tîm Seisnig oedd y ffefrynau, wedi'r cwbwl, roedd y Cymry wedi bod yn drychinebus yn ddiweddar ac er fod y cefnogwyr yn gobeithio am fuddugoliaeth, crasfa i'r tîm mewn coch oedd y farn realistig.

Ond gyda'r rheolwr newydd yn ysbrydoli'r garfan fe lwyddodd y Cochion i greu sioc anferth a threchu'r Saeson 2-0 ... ia, 2-0!

Roedd Darlington yn ail yn yr adran ond fe lwyddodd Wrecsam i llwyr reoli'r gêm ac yn dilyn y canlyniad arbennig yma, mae'r Dreigiau wedi codi oddi ar waelod yr adran.

Wooooohooooooooo!

Labels: ,

Pedwar allan o chwech ..

27.1.08
Wel, 'sa chi 'di gofyn i mi pythefnos yn ôl petawn i wedi bod yn hapus efo pedwar pwynt o'r ddwy gêm yn erbyn MK Dons a Bradford, 'swn i 'di bod yn ecstatic!

Felly, er gwaetha'r ffaith ein bod ni wedi ildio gôl o fantais yn erbyn y Bantams ddoe, mae'n rhaid cadw'r ffyd ac edrych ar y pethau positif.

Roedd y tîm yn brwydro'n galed am y 90 munud a chyda Carl Tremarco a Simon Spender yn edrych yn hynod o gyfforddus yn yr amddiffyn, mae'r hyder wedi llifo'n ôl trwy wythienau Steve Evans a Richard Hope.

Mae hi'n amlwg bod y gallu gan Jeff Whitley i chwarae ar lefel llawer uwch na hyn, ac mae ei brofiad a'i allu yn gaffaeliad i ni yng nghanol cae.

Ond er mwyn parhau i fod yn ffyddiog mae hi'n holl bwysig ein bod ni'n ennill yn Morecambe nos Fawrth er mwyn ceisio codi oddi ar y gwaelod ...

... croeswch eich bysedd!

Labels: ,

Gemau ail gyfe ... here we come!

20.1.08
Roedd yn ganlyniad gwbl annisgwyl ... ond eto, un roedd llwyth o bobl wedi ei ddarogan. Ia, 'dwi'n gwybod nad ydi hynny'n gwneud unrhyw synnwyr.

Rhywsut neu'i gilydd roedden ni wir yn credu y bydde ni'n gallu maeddu Milton Keynes er gwaetha'r ffaith eu bod nhw ar y brig a bod ni ar y gwaelod!

Gyda chwech o'r Magnificent Seven newydd: Danny Sonner, Paul Hall, Gavin Ward, Phil Bolland, Carl Tremarco a Stuart Nicholson yn chwarae, roedd fel gwylio tîm gwbl newydd.

Roedd y dorf yn chwarae eu rhan hefyd gyda'r Deuddegfed Dyn yn chwarae eu rhan yn llwyr. Yn wir, roedd hi'n braf cael bod yn gefnogwr Wrecsam ddoe, a 'dwi heb ddweud hynny ers oesoedd!

Labels: , ,

16 mlynedd yn ôl i heddiw ...

4.1.08

Labels: , , , , , ,

Wrecsam 2-1 Morecambe

25.8.07
Tymor 2007/08: Gêm #3
Fues i ar Y Cae Ras y Sadwrn diwethaf ar gyfer gêm gyntaf y tymor y Dreigiau ar eu tomen eu hunain.

Roedd yn od gweld y Kop yn wag ar gyfer gêm gynghrair ar Y Cae Ras, ond roedd y clwb wedi penderfynu peidio gweud cais am Drwydded Diogelwch arbennig gan yr awdurdod lleol tra bo'r gwaith datblygu yn mynd ymlaen tu ôl i'r teras hanesyddol.

Er hynny, roedd 'na awyrgylch gwych yn ystod yr hanner cyntaf, yn enwedig wedi i Michael Proctor rwydo dwy gôl hyfry i roi'r Dreigiau 2-0 ar y blaen.

Ond yn yr ail hanner fe ddaeth Morecambe yn ôl gyda'r newydd ddyfodiaid yn newid eu patrwm chwarae a dod yn fwy corfforol a llwyddodd Jon Newby i sgorio yn erbyn Wrecsam ... eto!

Mae Newby yn sgorio yn ein herbyn ni o hyd ... ond pan oedd o ar fenthyg ar Y Cae Ras y tymor diwethaf, methodd a rhwydo'r un gôl!

Beth bynnag, roedd yn siomedig i weld Wrecsam yn ildio cymaint o'r chwarae unwaith bo Sammy McIlroy wedi dweud wrth ei dîm i chwarae'n fwy corfforol gan mai dyma'r math o chwarae mae Wrecsam yn debygol o'i wynebu o wythnos i wythnos yn y bedwaredd adran.

Y gobaith yw mai blip oedd yr ail hanner ac unwaith bo Steve Evans yn holliach unwaith eto y bydd yr amddiffyn yn gallu ymdopi'n well efo bwlis yr adran!

Labels: , ,

Na ... no wê ... wir yr ...?

15.7.07
Xavi ValeroDyna oedd fy ymateb i pan glywais i enw hyfforddwr golwyr newydd Lerpwl - Xavi Valero.

Treuliodd Valero gyfnod ar Y Cae Ras ychydig yn ôl yn 2005, a 'dw i wedi mynd mor bell a'i grybwyll fel y chwaraewr gwaethaf dw i erioed wedi ei weld yn gwisgo crys Wrecsam!

Diolch i Valero cefais y fraint o fod yn dyst i un o'r digwyddiadau mwyaf prin yn y byd pêl-droed.

Mae gweld rheolwr yn cael ei hel o'r maes, eilydd yn cael cerdyn melyn tra ar y fainc neu gweld dyfarnwr yn gorfod gadael y maes gydag anaf yn bethau gymharol gyffredin. Cefais i dicio'r blwch yn yr "I-Spy book of Footballing Rarities" sydd werth o leiaf 50pt wedi i mi weld golwr yn cael ei eilyddio am ei fod o'n rybish!

Cafodd Valero ei eilyddio am hanner amser yn y gêm rhwng Chesterfield a Wrecsam yn Saltergate ym mis Ionawr 2005 a chlywsom ni air amdano ar ôl hynny ... tan rwan!

Dyma ran o'r hyn nes i sgwennu amdano mewn erthygl ar safle we Ar y Marc:
Roedd Valero'n edrych fel golwr - roedd yn gawr o ddyn ac yn sicr yn gallu bloeddio ar ei amddiffyn - ond, yn anffodus, roedd ganddo dair problem fawr:
i) nid oedd yn gallu arbed,
ii) nid oedd yn gallu dal pêl
iii) nid oedd yn gallu cicio.

Dw i'n edrych ymlaen at berfformiadau Pepe Rena'r tymor nesa yn barod!

Labels: , , , , , , ,

Pwy sy'n chwarae left back?

8.7.07
Cyn i mi gychwyn ar y rant yma, ga'i ofyn i chi os yda chi'n adnabod y chwaraewr yma ar y chwith?

Na ...?

Wel, fo oedd capten 'Lerpwl' ar gyfer y gêm gyfeillgar yn erbyn Wrecsam ddoe ... dw i wedi rhoi dyfynodau o amgylch y gair Lerpwl gan bod eu tîm nhw'n llawn o enwau anghyfarwydd.

Besian Idrizaj ydi enw'r chwaraewr, bachgen 19-mlwydd-oed o Awstria, a dyma pam dw i'n casau gemau pêl-droed cyfeillgar ar ddechrau'r tymor. Dyma oedd tîm Lerpwl:
Liverpool: Martin, Finnan, Hobbs, Paletta, Arbeloa, Pennant, Sissoko, Peltier, Hammill, Idrizaj (capt), Brouwer. Subs: Roque, Threlfall, Lindfield, Spearing, Nemeth, El Zhar, Simon, Hansen, Huth, Darby, Flynn.

Dim ond tri o'r enwau yna sydd yn gyfarwydd i mi ond nid dyna ydi gwraidd fy nghwyn ... roedd 'na dorf o 11,120 ar Y Cae Ras i wylio'r gêm. Heb law am y gêm olaf o'r tymor yn erbyn Boston, lle roedd dyfodol y clwb yn y fantol, dyna ydi'r dorf uchaf sydd wedi bod i'r Cae ras ers y gêm gyfeillgar efo Lerpwl y llynedd.

Lle mae'r pobl 'ma yn ystod y tymor?

Labels: , , , ,

Woooooooooooooooohoooooooooo!!

6.5.07
Mae'r cyfraniadau i'r blog wedi bod yn brin iawn yn ddiweddar, a hynny gan mod i'n chwysu pys ac yn cachu brics dros ddyfodol Wrecsam y y gynghrair bêl-droed ... wel, does dim angen poeni ddim mwy - da ni'n saff!!

Roedd prynhawn ddoe yn brynhawn llawn tensiwn, drama, pryder, gorfoledd, poen a phleser ... a tydw i byth eisiau mynd trwy'r fath beth byth eto.

Cefais i'r fraint o weithio i Radio Cymru ar y Kop brynhawn ddoe, felly roeddwn yn sefyll ar yr union fan lle roeddwn wedi treulio'r 80au hwr a'r 90au.

Yr union fan lle roeddwn wedi gweld Wrecsam yn colli yn erbyn Henffordd a Halifax cyn gorffen ar waelod gynghrair bêl-droed; yr union fath lle roeddwn i wedi dathlu dyrchafiad o dan Brian Flynn dwy flynedd yn ddiweddarach; y darn arbennig yna o'r Kop lle nes i wylio ni'n chwalu Rotherham 7-0, lle nes i ddathlu goliau Gary Bennett a chlodfori sgiliau Karl Connolly ... beth bynnag, 'da chi'n deall be' sydd gen i, yn dydach!

Roedd yr awyrgylch ar y Kop yn drydanol gyda'r lle yn orlawn a chyda pawb yn ysu am y pwynt oedd ei angen i'n cadw ni yn y gynghrair ...

... wel, roedd y lle fel y bedd pan sgoriodd Boston, a doedd y newyddion bod Macclesfield a Notts County yn gyfartal yn fawr o gysur. Roedd yn anodd tu hwnt ceisio darlledu ond dwi'n credu bod y siom yn amlwg o dôn fy llais!

Ond o mor wahanol oedd y darlledu wedi i Ryan Valentine rwydo o'r smotyn - er, weles i ddim o'r bêl yn taro'r rhwyd, doeddwn i, na chanoedd o gefnogwyr ar y Kop, methu gwylio'r gic! Roedd dagrau'n llifo i lawr fy moch pan roeddwn yn disgrifio awyrgylch y Kop i'r genedl wedi gôl Chris Llewellyn ac wrthi Nic Parry, oedd yn sylwebu ar ran Radio Cymru, ofyn am yr ymateb wedi'r drydedd gôl, wel roeddwn i'n neidio i fyny ac i lawr fel ffwl ac yn cael clamp o sws gan un o fy ffrindiau!!

Roedd yn ddiwrnod byth gofiadwy, ond plis, plis, plis, peidiwch a gadael i ni fynd trwy hynna eto ...

Labels: , , , , , ,

Mae wythnos yn amser hir ... ym mhêl-droed

15.4.07
Anghofiwch y nodyn isod ... mae Wrecsam am aros i fyny wedi'r cwbwl! Wedi chwalu un o geffylau blaen yr adran ar eu tomen eu hunain ac wedi i Boston golli yn Henffordd, mae Wrecsam wedi esgyn allan o'r ddau safle isaf yn y gynghrair.



Roedd pob un wan jac o'r chwaraewyr yn arbennig ddoe. Roedd yr awch i ennill ac i wneud yn iawn am ganlyniadau siomedig y Pasg yn amlwg ac mae'n rhaid canmol pob un o'r 14 chwaraewr ddaeth i'r maes yn Sincil Bank.

Wedi wythnos o ofidio, gallwn edrych ymlaen at wythnos o obeithio!

Labels: , , , ,

Siom, siom, siom ...

11.4.07
Tydw i ddim yn siwr iawn be 'dwi am sgwennu heddiw. Mae wedi cymryd bron i 48 awr cyn fy mod i'n gallu wynebu darllen negesfwrdd Red Passion neu darllen y Daily Post.
Roeddwn yn hynod, hynod siomedig wedi i'r Dreigiau golli ddydd Sadwrn, a hynny gan bod y perfformiad yn yr ail haner cymaint, cymaint gwell na'r hyn 'da ni wedi ei gael yn ddiweddar - na'i ddim sôn dim am y perfformiad trychinebus yn Macclesfield.

Roedd hyd yn oed rheolwr Notts County yn ymddiheuro am y fuddugoliaeth wedi'r gêm - sgoriodd County gyda'u hail ymosodiad o'r ail haner- a hynny wedi 87 munud - wedi i Jeff Whitley, Chris Llewellyn a Lee McEvilly daro'r trawst/postyn.

'Dwi wedi dechrau meddwl y gwaethaf ac ar negesfwrdd One Touch Football 'dwi wedi bod yn holi ymateb cefnogwyr Rhydychen i fywyd yn y Conference. Esgusodwch yr iaith fain, ond dyma ymateb un:
Basically, it might be something different to experience, but I wouldn't want it to last more than a season. Trouble is, with only one automatic promotion place it's the hardest league to get out of (at the top end), so if you have the choice, I would opt to avoid relegation.
Ia ... ond petai mor hawdd â hynny ...

Labels: , , ,

Wedi bod yn dathlu gormod ...

6.3.07
... i flogio!
O'r diwedd, mae Wrecsam wedi llwyddo i sicrhau triphwynt gyda Brian Carey wrth y llyw wedi i'r Dreigiau drechu Barnet yn Underhill ddydd Sadwrn.
Roedd dwy gôl gan Lee McEvilly yn yr ail hanner yn ddigon i sicrhau golygfeydd gwallgof ar y chwiban olaf:


Yn anffodus, doeddwn i ddim yn Llundain ar gyfer y gêm gan nad oedd unrhyw dren yn gadael Bangor ar ôl naw o'r gloch y bore fyddai'n cyrraedd Barnet cy hanner awr wedi pedwar yn y prynhawn. Roeddwn i'n dathlu wrth wrando ar Dylan Griffiths a Malcolm Allen ar Radio Cymru, ac mae'n rhaid dweud mod i wedi chwerthi tan roeddwn i'n sâl wedi i Malcolm fynnu na ddylai McEvilly fod yn chwarae dros Wrecam ond yn chwarae dros y 'Dog and Duck'!!

Beth bynnag, gan nad oeddwn yn gallu mynd i Barnet, aeth Ifan a minnau i'r New Oval yng Nghaergybi er mwyn gwylio Hotspur Caergybi yn rbyn Y Trallwng yng Nghpan Cymru.
Roedd torf o 709 yno ar gyfer y gêm, prawf, os bu angen, fod Caergybi â'r gefnogaeth a'r adnoddau i gynnal tîm yn Uwchgynghrair Cymru ... yn anffodus, nid yw'r chwaraewyr yn barod eto wrth i'r Trallwng ennill 5-1.

Gallwch weld lluniau a chlywed hanes y gêm ar safle we Ar y Marc.

Labels: , , , , , , , ,

Mynd o ddrwg i waeth ...

28.2.07
Mae pethau'n mynd o ddrwg i waeth i Wrecsam. Wedi colli i gôl yn y funud olaf yn erbyn Grimsby ac yn chael crasfa go iawn gan Amwythig, mae'r Dreigiau wedi colli yn erbyn Casnewydd yn y Cwpan Cenedlaethol.

Colli 2-1 yn erbyn tîm o'r Conference South ... "Ia, ond dwi'n siwr fod tîm Wrecsam yn ifanc a di-brofiad," medde chi. Wel, er fod Carey wedi gwneud wyth newid i'r tîm wynebodd Amwythig, mae pob un wan jac o'r tîm wedi chwarae i'r tîm cyntaf tymor yma, ac fe ddylai fod yn llawn digon cryf i guro Casnewydd!

Mae rhai cefnogwyr ar safle we Red Passion yn galw ar i Carey ymddiswyddo ...

Labels: , , ,

Dim angen dweud dim mwy ...

27.2.07

Wrecsam 1-3 Amwythig
Originally uploaded by blogdroed.

Labels: , , ,

Dau berfformiad arwrol ... un pwynt

21.2.07
Mae pethau'n edrych yn ddu iawn ar Y Cae Ras, ac er bod perfformiadau'r Dreigiau'n llawer gwell o dan Brain Carey (heb law am y shambls yn erbyn Wycombe), ryda ni'n dal i ddisgwyl am y fuddugoliaeth gyntaf yn 2007.

Roedd y tîm wedi brwydro'n dda iawn yn erbyn Caer ond methu'n glir â sgorio, ac yna neithiwr, wedi mynd 1-0 i fyny ar Barc Blundell, colli 2-1 oedd yr hanes wedi i Grimsby rwydo yn y funud olaf un.

Mae gan y BBC safle lle mae modd darogan y canlyniadau a chreu'r tabl yn ôl y canlyniadau.

Wedi i mi dreulio awr yn mynd trwy'r canlynaidau, gallaf eich sicrhau bydd Wrecsam yn aros i fyny!

Daw'r gemau tyngedfennol ar 7 Ebrill:
Accrington Stanley v Peterborough
Barnet v Hartlepool
Macclesfield v Wrecsam
Notts County v Boston Utd
Torquay v Walsall

ac, yn ôl fy nghanlyniadau i, dyma'r diwrnod bydd Wrecsam yn codi allan o'r ddau isaf ac agor bwlch ar Torquay, Boston ac Accrington Stanley - Torquay a Stanley fydd yn disgyn allan o'r gynghrair, gyda Wrecsam yn gorffen ar 41 pwynt - pum pwynt yn glir o Stanley.

Honest!

Labels: , ,

Gobeithio am fwy o hyn ddydd Sul ...

16.2.07

Labels: , , ,

Eire we go again ...

16.1.07
Mae Caerdydd wedi arwyddo ymosodwr Shelbourne, Jason Byrne, heddiw a hyn wythnos wedi'r clwb gwblhau trosgwlyddiad y golwr David Forde o glwb Derry City. Felly pam bo Caerdydd wedi cymryd diddordeb yng Nghynghrair Eircom erbyn hyn a pham nad ydynt yn sgowtio Uwchgynghrair Cymru am chwaraewyr?

Pam fo cymaint o chwaraewyr Uwchgynghrair Cymru wedi mynd i chwarae yng nghynghrair Lloegr gyda clybiau Seisnig? Lle oedd Caerdydd, Abertawe a Wrecsam i arwyddo'r chwaraewyr yma, chwaraewyr fel Alan Goodall (Rochdale), Glyn Garner (Leyton Orient) neu Eifion Williams (Hartlepool)?

Chwaraeodd Gary Roberts i Fangor a'r Trallwng ond roedd angen iddo symud i Accrington cyn i glwb yn y Bencampwriaeth gymryd sylw ohonno. Yn yr un modd, bu rhaid i Adebayo Akinfenwa symud i Torquay via Boston cyn i'r Swans ei arwyddo, er ei fod wedi treulio amser ar i lawr yr M4 ar Barc Jenner, ac roedd Forde hefyd gyda'r Barri cyn iddo symud i Iwerddon.

Pam nad oes unrhyw un o'r tri clwb Cymreig wedi bod yn edrych ar Jacob Mingorance yn Llanelli neu Adam Dickinson o Gei Connah ac rwy'n siwr byddai unrhyw un o'r tri wedi gallu gwneud efo sgoriwr goliau fel Marc Lloyd-Williams pan oedd Jiws yn ei anterth.

Labels: , , , , , ,

Smith 'di mynd

11.1.07
Wel, mae Denis Smith, ynghyd â'r is-reolwr, Kevin Russell, wedi ei ddiswyddo gan Glwb Pêl-droed Wrecsam, ac er nad yw'n sioc enfawr ei fod wedi cael ei ddiswyddo, mae amseriad y cwbwl yn anhygoel.

Hanner ffordd trwy'r ffenestr drosglwyddo a dim ond dau ddiwrnod cyn gêm nesaf ... pam?
Os oedd y bwrdd am weld Smith yn gadael pam ddim ei ddiswyddo ddydd Llun fel bo Brian Carey, y rheolwr dros dro, yn cael wythnos cyfan gyda'r garfan? Os oedd y bwrdd am weld Denis Smith yn gadael, pam ddim ei ddiswyddo wedi'r golled yn erbyn Accrington Stanley? Mae'n debyg nad oedd unryw un yn disgwyl curo Derby yn y gwpan ddydd Sadwrn diwethaf.

Felly pwy sydd nesaf? Darren erguson yw'r enw ar wefusau pawb, ond mae BBC Cymru'r Byd wedi cymryd cipolwg ar ambell i enw ...

Labels: , , , , ,

Notts County yw'r clwb gwaethaf

10.1.07
Yn ôl cwmni Littlewoods, Notts County ydi'r tîm pêl-droed gwaethaf i'w gefnogi. Mae'r arolwg yn ystyried ffactorau fel diswyddo rheolwyr, methu sicrhau dyrchafiad, colli mewn rowndiau terfynol o gwpanau, colli gemau cartref yn rheolaidd ayyb

Mae Abertawe yn rif 26 ar y rhestr, yn bennaf oherwydd eu bod wedi bod mor agos i fynd allan o'r gynghrair yn 2003 ac yna colli yn y gemau ail gyfle tymor diwethaf.
Mae Wrecsam yn rhif 32 ar y rhestr, mwy na thebyg oherwydd bod yn nwylo'r gweinyddwyr a cholli 10 pwynt llynedd, tra bo cefnogwyr Caerdydd yn ddigon hapus yn rif 52.

Labels: , , , ,

Tic arall yng Nglwb 92

7.1.07
Cefais i'r fraint o ymweld â Pride Park, Derby ddoe a gyfer gêm Wrecsam yn Nrhydedd Rownd Cwpan FA Lloegr - cae newydd i mi ac felly rhif 55 ar y rhestr o 92 clwb ('dwi wedi colli Doncaster Rovers ers ddechrau'r flwyddyn wedi iddyn nhw symud i stadiwm newydd).

Cefnogwyr Wrecsam yn Pride Park

Roedd bron i 3,000 o gefnogwyr Wrecsam (2,992 a bod yn fanwl gywir) wedi teithio i lawr yr A50 i gefnogi'r tîm, a tan i Derby sgoriodd eu trydedd gôl, dim ond y Cymry oedd i'w clywed o amgylch Pride Park.
Cafwyd perfformiad calonogol iawn gan Wrecsam, er y golled. Roedd Steve Evans yn gawr yn yr amddiffyn unwaith eto, ac os yw'r sibrydion am Leeds United yn wir, yna fe brofodd ddoe ei fod â'r gallu i chwarae ar lefel y Bencampwriaeth.

Roedd David Jones, chwaraewr canol cae Derby sydd y gymwys i chwarae dros Gymru, yn arbennig i'r tîm cartref. Mae ganddo draed chwim ac roedd ei basio a'i symudiadau yn ei gwneud yn amlwg pam fo'r Rams wedi talu £1 miliwn i Manchester United amdano. Er nad wyf yn hoffi'r ffaith ei fod yn dal i bendroni petai Cymro neu Sais ydi o, byddwn i'n sicr yn hapus ei weld yng nghanol cae Cymru.

Labels: , , , ,