Blog Droed

Hynt a helynt ffan ffwtbol Cymraeg ...

Cymru v Norwy

11.2.08
'Dwi heb gael cyfle i flogio am fuddugoliaeth gwych Cymru yn erbyn Norwy yr wythnos diwethaf gan fy mod i'n hynod o brysur yn y gwaith, ond dyma fy lluniau o'r noson ar Y Cae Ras.

Labels: , , , ,

Awê i 2010

10.1.08
Mae'r gemau rhagbrofol ar gyfer Cwpan y Byd 2010 wedi eu trefnu heddiw ac mae'n rhaid i mi ddweud, 'dwi'n reit fodlon efo'r trefn.

Yn wahanol i gemau Ewro 2008 mae gan Gymru gemau gymharol hawdd - Azerbaijan a Liechtenstein gartref - cyn y gemau anoddaf - Rwsia a'r Almaen oddi cartref. Fe ddylai hyn olygu bod y tîm yn teithio gyda buddugoliaeth a hwb i'r hyder.

Gemau Grŵp 4:

6 Medi 2008:
Cymru v Azerbaijan
Liechtenstein v Yr Almaen

10 Medi 2008:
Azerbaijan v Liechtenstein
Rwsia v Cymru
Y Ffindir v Yr Almaen,

11 Hydref 2008:
Cymru v Liechtenstein
Y Ffindir v Azerbaijan
Yr Almaen v Rwsia,

15 Hydref 2008:
Rwsia v Y Ffindir
Yr Almaen v Cymru

28 Mawrth 2009
Cymru v Y Ffindir
Rwsia v Azerbaijan
Yr Almaen v Liechtenstein

1 Ebrill 2009:
Cymru v Yr Almaen
Liechtenstein v Rwsia

6 Mehefin 2009:
Azerbaijan v Cymru
Y Ffindir v Lichtenstein

10 Mehefin 2009:
Y Ffindir v Rwsia

19 Awst 2009:
Azerbaijan v Yr Almaen

5 Medi 2009:
Azerbaijan v Y Ffindir
Rwsia v Liechtenstein

9 Medi 2009:
Cymru v Rwsia
Liechtenstein v Y Ffindir
Yr Almaen v Azerbaijan

10 Hydref 2009:
Rwsia v Yr Almaen
Liechtenstein v Azerbaijan
Y Ffindir v Cymru

14 Hydref 2009:
Azerbaijan v Rwsia
Liechtenstein v Cymru
Yr Almaen v Y Ffindir


Ac mae gan pawb flwyddyn i gynilo cyn mynd i Azerbaijan ...!

Labels: , ,

Cwpan y Byd 2010

12.12.07
Grŵp 4
Reit, 'dwi'n gwybod fy mod i'n hwyr iawn efo'r nodyn yma, ond fel nes i egluro isod, 'dwi 'di bod yn ofnadwy o brysur! 'Dwi ddim hyd yn oed wedi rhoi lluniau Frankfurt ar y wê eto!

Beth bynnag am hynny, beth am edrych ar y grŵp 'ma ar gyfer 2010. Yn wahanol i llawer o gefnogwyr Cymru, 'dwi'n eitha edrych ymlaen at fynd yn ôl i'r Almaen. Mae gan yr Almaen llond gwlad o feysydd arbennig a 'da ni'n cael cyfle i ymweld â dinas wahanol pob tro 'da ni'n eu wynebu nhw.

Wedi ymweld â'r maes yn ystod Cwpan y Byd llynedd, 'swn i wrth fy modd dychwelyd i Dortmund, neu, wedi methu cael ticed ar gyfer y Veltins Arena, mi fyddai Gelsenkirchen yn dda 'fyd.

'Dwi hefyd yn edrych ymlaen at fynd yn ôl i Rwsia. Roedd Moscow yn drip gwych pan fuo ni yna ar gyfer gêm ail gyfle Ewro 2004 - er gwaetha'r tywydd oer. Os na fuo chi yno, gofynnwch i unrhyw un oedd yno os ydy nhw'n edrych ymlaen at fynd ar Safari eto ... a dyna ddigon am hynny!

'Dwi ddim yn siŵr os fyddai'n mynd ar fy nhrydedd 'once in a lifetime trip' i Azerbaijan, wedi ymweld â Baku yn 2002 a 2004 - er wedi dweud hynny, mae hi'n bedair blynedd ers i mi fod yno belach ...! Yr unig beth 'swn i'n ei ddweud ydi, os nad yda chi wedi bod yno a 'da chi eisiau trip go anghyffredin, yna da chi ewch i Baku.

'Da ni erioed wedi bod i Liechtenstein o'r blaen - yn wir, unwaith yn unig dro 'da ni wedi herio'r wlad ar y maes pêl-droed a hynny ym mis Tachwedd 2006 ac er fod Vaduz yn mynd i fod yn ddinas newydd i mi, mae gwlad sydd â chyfuniad o ddiwylliant Awstria a diwylliant Y Swistir yn debygol o fod yn ddiflas tu hwnt!

Ond yr un ddinas 'dwi wir yn edrych ymlaen at fynd yn ôl iddi ydi'r Ffindir - roedd y gêm yn 2002 yn un o fy hoff deithiau tramor erioed.

Helsinki oedd y gêm gyntaf yng ngemau rhagbrofol Ewro 2004 ac er i ni sicrhau gêm gyfartal 1-1 mewn gêm gyfeillgar efo Croatia fis ynghynt, doedden ni ddim wir yn disgwyl ennill.

Roedd dros 1,000 o Gymry wedi teithio i'r Ffindir ar gyfer hwyl y penwythnos ... ond fe llwyddon ni i ennill er mwyn coroni penwythnos arbennig!

Roedd 'na lun gwych ar dudalen flaen yr Observer y diwrnod canlynol yn dangos cefnogwyr Cymru'n dathlu ... wel, heb law am fy ffrindiau oedd wedi mynd i'r ty bach a methu'r gôl!!

Os ga'i gyfle mi na'i sganio'r llun a'i roi fyny ar y blog.

Labels: , , , , , , ,

Gwarthus, gwarthus, gwarthus

15.10.07
'Dwi wir ddim yn siwr beth i'w feddwl.

Wedi chwalu Slofacia 5-2 yn Trnava, roedd pawb ar ben eu digon wrth deithio i Cyprus - rheolwr, chwaraewyr, cefnogwyr, y wasg ... pawb!

Ond roedd y performiad yn gwbwl warthus. Hyd yn oed pan oedden ni ar y blaen 1-0 roedd pawb yn gallu gweld mai matr o amser fyddai hi cyn i Gyprus sgorio.

'Does wybod beth sydd wedi mynd o'i le, ond roedd y gwendidau'n amlwg unwaith eto yn San Marino wrth i Gymru chwyso a chwythu wrth geisio curo tîm gwaethaf Ewrop.

Roedd 'na llu o sibrydion yn San Marino ynghylch pam fod pethau'n mynd o le a pham fo chwaraewyr yn anhapus a phwy sydd yn achosi'r drwgdeimlad ymysg y garfan.

Ond y gwir amdani ydi bod pob un wan jac o'r cefnogwyr sy'n talu pres mawr i deithio oddi cartref yn anhapus efo'r diffyg awch a'r diffyg parch sydd yn cael ei ddangos yn y crys coch.

Dim ond Craig Bellamy sydd i'w weld yn torri ei fol i chwarae dros Gymru ... dim ond Craig Bellamy sydd i'w weld â pharch yn y crys coch enwog.

Mae hynny'n anfaddeuol ...

Labels: , ,

Be goblyn 'di'r crys na?

4.10.07
Mae twohundredpercent, un o fy hoff flogwyr ar y we, wedi bod yn creu rhestrau yn ddiweddar [pam fo cefnogwyr pêl-droed yn mwynhau llunio cymaint o restrau?!] ac un o'r rhestrau sydd wedi dal fy llygaid i oedd yr un am y crysau pêl-droed gwaethaf erioed.

Mae'r dewis bron yn ddiddiwedd ers i glybiau ddechrau defnyddio ail, trydydd a hyd yn oed pedwerydd crys, ond mae 'na ddewis go eang ymysg crysau rhyngwladol Cymru hefyd.

Felly dyma fwrw ati i ddewis y crysau hyllaf erioed i gael eu gwisgo gan ein tîm pêl-droed cenedlaethol.


5.
Dewis dadleuol efallai, ond tra bo'r fersiwn coch o'r crys yma ymysg y crysau pêl-droed gorau erioed, mae'r fersiwn melyn yn erchyll. Dydi'r streipen coch a gwyrdd ddim yn edrych yn iawn ac mae pawb yn gwybod mai golwyr sy'n gwisgo crysau melyn rhyngwladol, nid chwaraewyr!




4.
Cafodd y crys erchyll yma ei ddylunio fel teyrnged i John Charles yn ôl pob sôn ... wel, sori, ond 'doedd o'm yn llawer o deyrnged nagoedd? Mae'r streipen wen ar grys du i fod i gynrychioli Juventus gyda'r streipen goch yn cynrychioli Cymru ... hmmmm, swnio fel nonsens marchnata i mi!




3.
Yn ystod teyrnasiad Bobby Gould fe benderfynodd Lotto nad oedd ein perfformiadau ni'n ddigon chwerthinllyd ar y maes, ac o'r herwydd bu rhaid i'r chwaraewyr wisgo crys oedd yn debycach i'r hyn fyddai Leighton Rees yn ei wisgo!




2.
Cwmni Lotto sydd yn gyfrifol am y crys nesa' 'ma hefyd. 'Does wybod beth ar y ddaear oedd yn mynd trwy feddwl y dylunydd y bore cafodd hwn ei greu. Streips fertigol, diemwntau, tua phedwar gwahanol liw gwyrdd ... mam bach!




1.
'Dwi ddim yn meddwl bod angen dweud dim byd nagoes! Petrol ydi lliw'r crys yn ôl Umbro, ond 'dwn i ddim beth oedd ar eu pennau nhw efo'r holl sgwigls 'na ... ond y peth gwaethaf am y crys yma ydi bo' fi wedi prynu un!

Labels: , , ,

Savage yn anghofus?

11.9.07
Mae Robbie Savage wedi bod wrthi eto. Mae o'n beirniadu John Toshack yn y Daily Mirror y tro hyn, ond bechod na fyddai o'n cael ei ffeithiau'n gywir.
"Only 25,000 turned up for a qualifier against one of the world's best teams - that tells you everything.

"Just a few years ago under Mark Hughes we beat Germany in a friendly at the Millennium Stadium in front of 75,000 - that tells you how far we've sunk."

Hmmmmm, dwi'n credu bod cof Mr Savage yn pylu. Dim ond ychydig dros 36,000 oedd yn y stadiwm y noson hwnnw fel y gallwch weld o'r fideo isod.

Labels: , , ,

"Smalwich mai ddim Jyrmans ydy nhw!"

10.9.07
Tymor 2007/08: Gêm #5
Dyna waeddodd un boi oedd yn eistedd tu ôl i mi yn Stadiwm y Mileniwm nos Sadwrn.

Ac mae'n deg dweud bod Cymru wedi rhoi lot gormod o barch i'r Almaenwyr gyda Bastian Schweinsteiger a Thomas Hitzlsperger yn chwarae gêm o keep-ball yng nghanol cae.

Er mai dim ond dwy gôl sgoriodd yr ymwelwyr, roedden nhw yn llwyr reoli'r gêm ac roedd rhywun y credu y bydden nhw wedi gallu sgorio ar unrhyw adeg pe byddai wir angen iddyn nhw wneud hynny.

Roedd yn siom na chafodd Jens Lehmann ei brofi o gofio'r dechrau sigledig mae golwr Arsenal wedi dioddef y tymor yma.

Mae'n syndod hefyd bod John Toshack wedi dechrau'r gêm efo system 5-4-1 ar ôl i Bellamy dynnu yn ôl yn hwyr yn y dydd, yn enwedig o gofio bod y garfan wedi ymarfer defnyddio system 3-5-2 trwy'r wythnos ... beth oedd o'i le efo defnyddio Robert Earnshaw?

Roedd Freddy Eastwood ar goll ar ben ei hun yn y llinell flaen a 'dwi'n credu bod Cymru wedi edrych yn llawer gwell unwaith bo Earnie wedi dod i'r maes fel ail ymosodwr.

Tydi hi ddim yn warth i golli 0-2 yn erbyn tîm mor dda â'r Almaen, ond mae'n siomedig tu hwnt colli heb frwydr.

Labels: , , , ,

Byron Stevenson 1956-2007

6.9.07
Mae Byron Stevenson yn enw sydd wastad wedi f'atgoffa fi o fy mhlentyndod. Sticers Panini, crysau heb noddwyr, meysydd mwdlyd, gemau am dri o'r gloch ar brynhawn dydd Sadwrn ... siwmperi fel pyst pêl-droed ;-)

Fe ddaeth yn newyddion trist bore dydd Iau fod Byron Stevenson wedi colli ei frwydr yn erbyn canser y gwddf, diwrnod yn unig cyn y byddai wedi dathlu ei benblwydd yn 51.

Er nad oedd Stevenson y chwaraewr mwyaf disglair yn y byd, roedd yn chwaraewr oedd yn rhoi 100% pob tro roedd yn camu i'r maes ac roedd yn Gymro balch iawn.

Yn ôl Brian Flynn, oedd yn gyd chwaraewr â Stevenson efo Leeds a Chymru, roedd o wrth ei fodd yn cael bod yn rhan o'r garfan rhyngwladol.

"Roedd o mor falch," meddai Flynn. "Fo oedd y cyntaf i roi'r crys coch ymlaen a'r cyntaf i gamu i'r maes pob tro roedd yn ymuno efo'r garfan."

Bechod na fyddai rhai o bêl-droedwyr heddiw efo'r un agwedd ... Mr Collins unrhyw un?

Labels: , , , ,

Beckenbauer Bwcle ...?

5.9.07
Mae Danny Collins wedi penderfynnu nad ydi o eisiau chwarae dros Gymru yn erbyn Yr Almaen a Slofacia yng ngemau rhagbrofol Ewro 2008.

Mae'r amddiffynnwr canol eisiau canolbwyntio ar gadw ei le yn nhîm Sunderland yn hytrach na chynrychioli ei wlad.

Wel, mae'n ddrwg iawn gen i, ond pwy mae'r boi o Bwcle yn feddwl ydi o? Franz Beckenbauer? Ydi o'n credu fod o ddigon da i ddewis a dethol ei gemau dros Gymru?

Y gwir plaen amdani ydi bod Collins yn flin bod chwaraewyr fel Lewin Nyatanga, Steve Evans, Joe Ledley a Gareth Bale yn cael eu dewis ac ei fod o'n gorfod eistedd ar y fainc.

Llai na pum mlynedd yn ôl roedd o'n chwarae i Fwcle yng Nghynghrair Undebol y Gogledd cyn ymuno efo Caer oedd, ar y pryd, yn y Conference.

Ond yn amlwg, rwan ei fod o'n chwarae yn yr Uwchgynghrair, mae o'n rhy dda i eistedd ar y fainc i Gymru ... wel, os mai dyna ydi ei agwedd, 'da ni'n well allan hebddo fo a'i ego.

'Dwi'n gwybod ei bod hi'n ystrydeb ond fe fyddai'r rhan fwyaf o gefnogwyr Cymru yn cerdded i Gaerdydd er mwyn cael cyfle i wisgo'r crys coch ... yn anffodus mae pêl-droediwyr y dyddiau yma'n credu eu bod nhw uwchlaw bod yn eilyddion - 'di o ddim yn dda i'r ddelwedd 'chi'n gweld.

Os nad ydi Collins yn fodlon bod yn rhan o garfan byddai'n well anghofio amdano.

Labels: , , , ,

Bwlgaria 0-1 Cymru

25.8.07
Tymor 2007/08: Gêm #4
Roedd hi'n uffernol o boeth ar arfordir y Môr Du ar gyfer y gêm yma - roedd hi'n ddigon anodd ffeindio’r egni i godi pot peint heb sôn am redeg o gwmpas cae pêl-droed am 90 munud!

Roedd 'na siom aruthrol i'r cefnogwyr selog wrth i ni gyrraedd y maes i ddarganfod bod Cymdeithas Bêl-droed Bwlgaria wedi bod yn gwerthu tocynnau ar gyfer ein heisteddle ni yn y resorts gwyliau cyfagos.

O'r herwydd, roedd 'na lond lle o grysau West Ham, Aston Villa, Man City a ... gulp ... gasp ... gulp ... Lloegr!! Ia - crysau Lloegr mewn eisteddle ar gyfer cefnogwyr CYMRU - ac i wneud pethau'n waeth, roedd 'na un ffŵl dwl wedi clymu baner San Siôr i'r ffens efo fflagiau'r Cymry!

Diolch i'r drefn, roedd heddlu o Gymru allan yn Bourgas ac fe gawsom ni'r Cymry ein hebrwng i floc gwahanol o seddi ... ac fe roddodd dau o gefnogwyr Caerdydd eu Draig Goch dros ben baner San Siôr ar y ffens!

O ran y gêm, dwi'n credu bod Wayne Hennessey a Freddy Eastwood wedi dwyn y penawdau i gyd, ond mae'n rhaid i mi dalu teyrnged i David Vaughan. Fe weithiodd Vaughan mor galed trwy gydol y gêm a 'dwi'n credu iddo chwarae'n well na 'dwi erioed wedi gweld o'n chwarae yng nghrys coch Cymru.

Roeddwn i'n poeni ychydig pan glywes i ei fod o'n mynd i symud i Real Sociedad gan nad oeddwn i'n meddwl fod o'n ddigon corfforol i allu ymdopi â'r gêm yn Sbaen. Ond o'r hyn weles i yn Bourgas, fe ddylai fod yn gaffaeliad i'r tîm o Donostia.

Labels: , , , , , , ,

Blymin' awê gôls ...

3.8.07
Roedd na siom aruthrol i'r Rhyl yn Valkeakoski neithiwr wrth i FC Haka rwydo dwy gôl mewn dau funud yn Valkeakoski er mwyn sicrhau bod y gêm yn gyfartal 3-3 dros y ddau gymal.

Ac am y trydydd tro'r tymor yma mae tîm o Gymru'n colli ar y rheol goliau oddi cartref. Cafoddd Llanelli gêm gyfartal 6-6 efo Vetra Vilnius o Lithiwania cyn i'r Seintiau sicrhau gêm gyfartal 4-4 efo Ventspilso Latfia ond mae'r tri chlwb allan o Ewrop oherwydd y rheol gfoliau oddi cartref bondigrybwyll 'ma.

Dwi ddim yn siwr beth ydi manteision y rheol yma bellach. Fe gafodd ei gyflwyno pan fod teithio dramor yn rhywbeth digon anghyffredin, yn enwedig i lefydd tu ôl i'r llen haearn. Ond yn nyddiau Ryan Air ac EasyJet mae'n ddigon cyfleus i ymweld a bron i unrhyw ran o Ewrop.

Ac mae hynny'n dod a fi'n ddigon taclus at fy ail rant ... mae Uefa yn trefnu gemau rhagbrofol Cwpan Uefa y rhanbarthol, ond dwi wir ddim yn deall y rhesymeg.

Dim pêl-droed yn ystod yr haf ydi'r ateb i dimau Cymru ond draw agored lle mae modd i'r clybiau Cymreig wynebu timau o pob rhan o Ewrop. Wrth osod timau Cymru yn y rhanbarth ogleddol efo timau Scandinafia a gwledydd y Baltic mae nhw'n siwr o orfod herio timau sydd hanner ffordd trwy eu tymor, ond pam na chaiff y Cymry herio timau o Montenegro, Croatia, Cyprus, Melita, Macedonia ayyb sydd hefyd yn chwarae pêl-droed yn ystod y gaeaf?

Y rheswm mae Uefa wedi ei roi am osod y clybiau'n rhanbarthol ydi ceisio atal costau teithio anferthol, ond y gwir amdani ydi bod teithio i unrhyw ran o Ewrop yn gymharol rhad y dyddiau hyn.

Yn amlwg mae dod allan o'r het i wynebu tîm o Georgia, Azerbaijan neu Kazahkstan yn golygu taith gostus, ond dyna ni, dyna ydi'r luck of the draw, fel dywed y Sais.

Hefyd, dwi'n rhagweld sefyllfa ymhen ychydig o flynyddoedd lle mae chwarae yn Ewrop yn mynd i fod yn ddiflas tu hwnt i dimau Cymru gyda taith arall i Latfia, Ffindir neu Norwy.

Mae angen agor y draw allan er mwyn sicrhau bod diddordeb y cefnogwyr yn parhau - roedd yn arfer bod yn hwyl gwylio'r enwau'n dod allan o'r het a cheisio canfod gwybodaeth am Valleta, HIT Gorica neu Shamkir ond erbyn hyn, 'da ni'n gweld yr un hen enwau o'r un hen wledydd.

Bois bach, di petha' ddim fel buo nhw!

Labels: , , ,

Dim arian i ferched Charlton

25.6.07
Er mwyn parhau efo'r themau pêl-droed merched, deth y newyddion dros y Sul bod Charlton Athletic am dorri cysylltiad efo'u tîm merched er mwyn arbed arian.

Mae hyn yn ergyd drom i gêm broffesiynol y merched yn Lloegr gan fod perthynas Charlton efo'u tîm merched yn un o'r rhai gorau. Ond mae'r Addicks wedi penderfynnu peidio cefnogi'r merched mwyach gan atal y £250,000 roeddent yn ei roi'n flynyddol.

Mae'n siwr bod Charlton yn gorfod meddwl am pob ceiniog wedi iddyn nhw ddisgyn allan o'r Uwchgynghrair ond y gwir plaen ydi bod y clwb yn parhau i dderbyn £11m gan yr Uwchgynghrair am ddau dymor arall ac mae nhw hefyd ar fin gwerthu Darren Bent i Spurs am £17m.

Gyda chlybiau fel manchester United a Birmingham City hefyd yn torri cysylltiad efo'u timau merched, mae'n gyfnod digon sigledig i bêl-droed merched yn Lloegr, a mae hyn yn dod ychydig fisoedd wedi i gapten tym cenedlaethol Cymru, Jane Ludlow, feirniadu'r Gymdeithas Bêl-droed yng Nghymru am eu diffyg cefnogaeth.

Mae mwy a mwy o ferched yn chwarae pêl-droed yn Ynysoedd Prydain ac yn enwedig yma yng Nghymru, gyda nifer o dimau newydd yn dechrau pob tymor. Ar Ynys Môn, er enghraifft, mae pedwar tîm newydd i ferched iau yn gobeithio dechrau y tymor nesaf a'r gobaith, yn y pen draw, fydd cychwyn cynghrair pêl-droed i ferched ar yr ynys.

Mae'r gêm i ferched yn ffynnu ac mae'n hen bryd i'r cyrff llywodraethol sylweddoli eu bod nhw'n gyfrifol am bêl-droed ... nid pêl-droed i ddynion.

Labels: , , , ,

Cymru v Seland Newydd

27.5.07
Yn lle canolbwyntio ar ochr negyddol (anferth) o'r gêm yma, dw i am ganolbwyntio ar yr un pwynt positif personol gwych. Yn lle cael parti diwedd tymor yn 'stafell gefn rhyw dy tafarn roeddwn i wedi trefnu bws i'r Cae Ras ar gyfer tîm dan-9 Y Fali.

Dyma'r tro cyntaf i'r mwyafrif ohonnyn nhw fod mewn gêm bêl-droed, heb sôn am gêm rhyngwladol ac roedd gweld y cyffro ar eu hwynebau'n gwneud yr holl stress o drefnu'r daith werth chweil.



Dw i off i Eisteddfod yr Urdd am yr wythnos felly na'i drio postio cyn y gêm yn erbyn Y Weriniaeth Siec, ond does na'm sicrwydd, felly tan hynny ... wela'i chi yn y 'singing section'!

Labels: , , , ,

Clueless 1-0 Useless

29.3.07
Dyna oedd y pennawd yn un o bapurau newydd Iwerddon fore Sul, ac oni bai bo gen i'r blog 'ma i'w 'sgwennu, 'dwi'n credu byddwn i'n ei gadael hi'n y fan yna!

Y peth mwyaf siomedig am y gêm a'r canlyniad oedd bod Iwerddon yna i'w curo. 'Dwi wedi teithio milltiroedd ar filltiroedd yn dilyn Cymru ac wedi gweld ni'n colli - ac yn colli'n drwm - yn erbyn timau oedd yn llawer gwell 'na ni. Ond y gwahanaiaeth mawr yn Nulyn oedd bod Iwerddon yr un mor siomedig â ni ...
Mae eu rheolwr wedi bod o dan y lach gan y wasg a chefnogwyr Iwerddon ac wedi crafu buddugoliaeth yn erbyn San Marino yn eu gêm ddiwethaf, roedd yr hyder ymysg y chwaraewyr yn isel iawn, ond nhw, ac nid ni, oedd yn chwarae gydag awch a chyda'r hyder.

Roeddwn i hefyd ychydig bach yn siomedig â Croke Park. Wedi'r holl heip yn yr wythnosau oedd yn arwain at y gêm am y "stadiwm odidog" 'ma yng ngogledd Dulyn, roeddwn i'n disgwyl pethau mawr.
Ond roedd yr awyrgylch yn y stadiwm yn ofnadwy - gan nad oedd to uwchben cefnogwyr Cymru, roedd yr holl ganu a bloeddio yn diflannu, ac heb gefnogwyr oddi cartref yn creu swn, roedd y Gwyddelod eu hunain yn ddistaw hefyd. Yn wir, roedd 'na blymin' Mexican Wave ar ôl awr o'r chwarae ... mae hynny'n dweud y cwbwl!

Labels: , , , , ,

4,500 i Ddulyn ...

21.3.07
... felly lle mae pawb wedi bod?
Ia, 'dwi'n gwybod y dylwn i fod yn falch bod cymaint o gefnogwyr yn teithio draw i Ddulyn ar gyfer y gêm rhagbrofol Ewro 2008 ... ond mae dyn yn gorfod gofyn pam fo cyn lleied yn teithio i gefnogi'r tîm fel arfer?

Dim ond ychydig dros 200 oedd yn Belfast fis diwethaf ar gyfer taith yr un mor fer i ynys Iwerddon ... cyn i chi ddweud dim byd, 'dwi'n gwybod mai gêm gyfeillgar di-nod oedd honno ac ei bod wedi ei chwarae ar nos Fawrth ac nid ar benwythnos ... ond mae clywed bod 4,300 ychwanegol yn teithio ar gyfer y gêm yn Croke Park yn syfrdanol!

Wrth gwrs, nid ffenomenon newydd mo hyn - roedd dros 4,000 ym Milan ym mis Medi 2003, a hynny llai na mis wedi i ryw 300 o gefnogwyr deithio i Belgrade ar gyfer gêm yr un mor bwysig ac mewn dinas llawer difyrach.

Mae'n rhaid i mi gyfaddef mai wrth teithio i wylio 'gêm fawr' y dechreuais i ddilyn y tîm cenedlaethol yn rheolaidd - roeddwn yn un o'r miloedd aeth draw i Eindhoven ar gyfer y grasfa 7-1 yn erbyn Yr Iseldiroedd yn ôl ym 1996, ond ers hynny rwyf wedi cael lot mwy o hwyl mewn dinasoedd fel Minsk, Baku a Kiev na chefais mewn dinasoedd fel Milan a Manceinion!

Os ydych chi'n un o'r rhai sy'n profi'r wefr am y tro cyntaf yn Nulyn, neu'n mynd dramor am y tro cyntaf ers Milan, yna gwnewch yn siwr, da chi, eich bod yn dilyn y tîm i ddinas ddiarffordd hefyd er mwyn profi taith llawer difyrach!

Labels: , ,

Rhun Owens

14.2.07
Cefais fraw i glywed bod ysgrifennydd CPD Aberystwyth, Rhun Owens, wedi marw yn dilyn brwydr hir yn erbyn cancr. Er na chwrddais i â Rhun erioed, roeddwn wedi siarad ag ef droeon yn rhinwedd fy swydd. Roedd ei gariad a'i angerdd tuag at CPD Aberystwyth yn amlwg ac yn ogystal ag Aber, roedd Rhun yn gefnogwr brwd o bêl-droed yng Nghymru.
Roedd yn barod am sgwrs pob amser ac ar sawl achlysur, cawsom drafodaeth hir a dwys am ddyfodol byd y bêl gron yng Nghymru. Bydd pêl-droed Cymru yn dlotach iawn heb Rhun Owens.

Hoffwn estyn pob cydymdeimlad i'w deulu ei ffrindiau ac i Glwb Pêl-droed Aberystwyth

Labels: , ,

Aelodau'r Cynulliad yn bygwth yr FAW

27.1.07
Mae hi wedi bod yn wythnos prysur a chythryblus i'r Gymdeithas Bêl-droed yng Nghymru wedi i bwyllgor y Cynulliad sydd yn gwneud arolwg o'r gamp yng Nghymru feirniadu'r FAW am beidio fynd ger eu bron.

Yn bersonol, dwi'n tueddu i gytuno efo ysgrifennydd y gymdeithas, David Collins ... rhywbeth nad ydw wi'n ei wneud yn aml iawn - yr unig dro arall i mi gofio cytuno efo Mr Collins oedd pan y gwrthododd ymuno â Lloegr a Gogledd Iwerddon a cheisio creu tîm Prydeinig ar gyfer Gemau Olympaidd 2012.

Mae cymdeithasau llawer mwy na Chymru, fel Gwlad Pwyl a Gwlad Groeg wedi eu gwahardd gan Fifa oherwydd ymyraeth gan eu llywodraethau.
Y rheswm i Wlad Groeg, sydd yn bencampwyr Ewrop, gael eu gwahardd oedd ymyraeth y Gweinidog Chwaraeon, George Orfanos. Dywedodd Orfanos fod yr HFF (Cymdeithas Bêl-droed Gwlad Groeg), sy'n derbyn arian gan y llywodraeth, â system bleidleisio gwrth-ddemocrataidd.
"We want more democratic voting rules - rules that apply to all other sporting federations in Greece. If they insist, state protection will be withdrawn."

Sydd ddim mor annhebyg i'r hyn mae pwyllgor y Cynulliad yn fygwth:
"without necessary change, governing body status could be removed from the FAW".

Yn amlwg, nid penderfyniad gwleidyddion ddylai hyn fod, ond penderfyniad Fifa ac Uefa - ys gwn i os yw'r aelodau cynulliad yma'n credu eu bod yn gwneud peth da trwy fygwth bodolaeth y tîm cenedlaethol?

ON
Dyma'r tystiolaeth gafodd ei gyflwyno i'r pwyllgor

Labels: , , , , ,

Eire we go again ...

16.1.07
Mae Caerdydd wedi arwyddo ymosodwr Shelbourne, Jason Byrne, heddiw a hyn wythnos wedi'r clwb gwblhau trosgwlyddiad y golwr David Forde o glwb Derry City. Felly pam bo Caerdydd wedi cymryd diddordeb yng Nghynghrair Eircom erbyn hyn a pham nad ydynt yn sgowtio Uwchgynghrair Cymru am chwaraewyr?

Pam fo cymaint o chwaraewyr Uwchgynghrair Cymru wedi mynd i chwarae yng nghynghrair Lloegr gyda clybiau Seisnig? Lle oedd Caerdydd, Abertawe a Wrecsam i arwyddo'r chwaraewyr yma, chwaraewyr fel Alan Goodall (Rochdale), Glyn Garner (Leyton Orient) neu Eifion Williams (Hartlepool)?

Chwaraeodd Gary Roberts i Fangor a'r Trallwng ond roedd angen iddo symud i Accrington cyn i glwb yn y Bencampwriaeth gymryd sylw ohonno. Yn yr un modd, bu rhaid i Adebayo Akinfenwa symud i Torquay via Boston cyn i'r Swans ei arwyddo, er ei fod wedi treulio amser ar i lawr yr M4 ar Barc Jenner, ac roedd Forde hefyd gyda'r Barri cyn iddo symud i Iwerddon.

Pam nad oes unrhyw un o'r tri clwb Cymreig wedi bod yn edrych ar Jacob Mingorance yn Llanelli neu Adam Dickinson o Gei Connah ac rwy'n siwr byddai unrhyw un o'r tri wedi gallu gwneud efo sgoriwr goliau fel Marc Lloyd-Williams pan oedd Jiws yn ei anterth.

Labels: , , , , , ,

Ynyswyr enwog

6.12.06
Roedd y Guardian Knowledge wedi gofyn am bêl-droedwyr ynysig wythnos diwethaf, wel, wrth gwrs, ni allwn adael i'r eiliad basio heb grybwyll y Monwysyn, Tony Roberts!

Labels: , , ,

Noson dda yn Wrecsam

15.11.06
Mae'n rhaid mi gyfaddef mod i wedi poeni na fyddai cefnogwyr pêl-droed yn gogledd yn troi allan ar gyfer y gêm gyfeillgar â Liechtenstein. Roedd pob math o sibrydion mai 700 o docynnau yn unig oedd wed eu gwerthu ac mai ychydig droes fil oedd y Gymdeithas Bêl-droed yn digwyl i'r Cae Ras.
Ond mae'n amlwg nad oes genyf ddigon o ffydd, gan er mai gêm dibwys yn erbyn tîm sydd rif 161 ar restr Fifa oedd hon, roedd 8,752 ar Y Cae Ras neithiwr.

Ar y maes, cafwyd perfformiad canmoladwy iawn gan Gymru. Roedd dwy gôl odidog Jason Koumas werth pris y tocyn ar ben eu hunain a chafwyd perfformiad ac ymateb campus gan Steve Evans ar ei ymddangosiad cyntaf dros ei wlad - roedd yn braf gweld chwaraewr rhyngwladol yn cymeradwyo pob cornel o'r stadiwm cyn gadael am ei gawod!

Yr unig beth sydd yn creu rhwystredigaeth yw diffyg Craig Bellamy i greu neu sgorio mwy o goliau. Mae ei ddawn yn amlwg ac fe berodd loes i Liechtenstein drwy'r nôs, ond er ei gyflymder a'i allu amlwg, nid oedd ei bas yn llwyddo i ganfod cyd chwaraewr hanner digon amal. Yn amlwg nid yw ei bartneriaeth yn y linell flaen gydag Earnshaw yn gweithio - roedd y ddau yn treulio cryn dipyn o amser yn cwyno am ddiffyg pas neu ddiffyg rhediad gan y naill neu'r lall. Roedd gwell dealltwriaeth rhwng Bellamy â'r eilydd, Chris Llewellyn, ond, er ei gôl hwyr, nid yw Llewellyn yn ddigon da i chwarae ar y lefel rhyngwladol.

Labels: , , , , , , ,

S4C a thîm pêl-droed Cymru

14.11.06
Mae safle we S4C yn rhoi sylw i gêm Cymru v Liechtenstein gan ddefnyddio'r llun yma:

Bechod fod pob un o'r chwaraewyr yn y llun wedi ymddeol o bêl-droed rhyngwladol!!

Labels: , ,

Cymru v Liechtenstein

12.11.06
Mae SKY yn rhedeg trêl sydd yn dweud bod Cymru v Liechtenstein yn dod yn fyw o Stadiwm y Mileniwm yng Nghaerdydd nos Fawrth ... wel dwi'n credu bydd Bryn Tomos ac Alan Parry yn unig uffernol nos Fawrth wrth i weddill Cymru wylio'r gêm ar Y Cae Ras, Wrecsam!

A thra bo gorsaf deledu Uncle Rupert yn gwneud coc-yp, o leiaf mae un o'i bapurau newydd yn gwybod lleoliad y gêm, ond dwi'n amau'n gryf bod y gohebydd wedi bod i'r Cae Ras yn ddiweddar:
Sunday Times 12/11/06

Labels: ,