Blog Droed

Hynt a helynt ffan ffwtbol Cymraeg ...

Cofio tân Bradford

27.12.07
Roedd Lincoln City yn ymweld â Valley Parde, Bradford ddoe am y tro cyntaf ers i 56 o gefnogwyr golli eu bywydau mewn tân ar 11 Mai, 1985.

Yn rhyfedd ddigon, rheolwr Lincoln ddoe, Peter Jackson, oedd capten y Bantams ar y diwrnod hwnnw a chafodd ei gyflwyno efo tlws pencampwriaeth y Drydedd Adran cyn y gêm gyda thorf o 11,076 yno er mwyn ymuno yn y dathlu.

Pum munud cyn yr egwyl fe gafwyd tân bychan o dan yr eisteddle; y gred yw mai stwmpyn sigarét oedd yn gyfrifol am gychwyn y tân ond bod sbwriel o dan yr eisteddle wedi tanio gan roi'r eisteddle pren ar dân.

Yr eironi mwyaf am y trasiedi enfawr yma yw fod gweithwyr i fod i ddechrau trin yr eisteddle ar y dydd Llun canlynol er mwyn sicrhau fod y maes yn pasio'r profion diogelwch ar gyfer yr Ail Adran.

Labels: , , ,

Cwpan y Byd 2010

12.12.07
Grŵp 4
Reit, 'dwi'n gwybod fy mod i'n hwyr iawn efo'r nodyn yma, ond fel nes i egluro isod, 'dwi 'di bod yn ofnadwy o brysur! 'Dwi ddim hyd yn oed wedi rhoi lluniau Frankfurt ar y wê eto!

Beth bynnag am hynny, beth am edrych ar y grŵp 'ma ar gyfer 2010. Yn wahanol i llawer o gefnogwyr Cymru, 'dwi'n eitha edrych ymlaen at fynd yn ôl i'r Almaen. Mae gan yr Almaen llond gwlad o feysydd arbennig a 'da ni'n cael cyfle i ymweld â dinas wahanol pob tro 'da ni'n eu wynebu nhw.

Wedi ymweld â'r maes yn ystod Cwpan y Byd llynedd, 'swn i wrth fy modd dychwelyd i Dortmund, neu, wedi methu cael ticed ar gyfer y Veltins Arena, mi fyddai Gelsenkirchen yn dda 'fyd.

'Dwi hefyd yn edrych ymlaen at fynd yn ôl i Rwsia. Roedd Moscow yn drip gwych pan fuo ni yna ar gyfer gêm ail gyfle Ewro 2004 - er gwaetha'r tywydd oer. Os na fuo chi yno, gofynnwch i unrhyw un oedd yno os ydy nhw'n edrych ymlaen at fynd ar Safari eto ... a dyna ddigon am hynny!

'Dwi ddim yn siŵr os fyddai'n mynd ar fy nhrydedd 'once in a lifetime trip' i Azerbaijan, wedi ymweld â Baku yn 2002 a 2004 - er wedi dweud hynny, mae hi'n bedair blynedd ers i mi fod yno belach ...! Yr unig beth 'swn i'n ei ddweud ydi, os nad yda chi wedi bod yno a 'da chi eisiau trip go anghyffredin, yna da chi ewch i Baku.

'Da ni erioed wedi bod i Liechtenstein o'r blaen - yn wir, unwaith yn unig dro 'da ni wedi herio'r wlad ar y maes pêl-droed a hynny ym mis Tachwedd 2006 ac er fod Vaduz yn mynd i fod yn ddinas newydd i mi, mae gwlad sydd â chyfuniad o ddiwylliant Awstria a diwylliant Y Swistir yn debygol o fod yn ddiflas tu hwnt!

Ond yr un ddinas 'dwi wir yn edrych ymlaen at fynd yn ôl iddi ydi'r Ffindir - roedd y gêm yn 2002 yn un o fy hoff deithiau tramor erioed.

Helsinki oedd y gêm gyntaf yng ngemau rhagbrofol Ewro 2004 ac er i ni sicrhau gêm gyfartal 1-1 mewn gêm gyfeillgar efo Croatia fis ynghynt, doedden ni ddim wir yn disgwyl ennill.

Roedd dros 1,000 o Gymry wedi teithio i'r Ffindir ar gyfer hwyl y penwythnos ... ond fe llwyddon ni i ennill er mwyn coroni penwythnos arbennig!

Roedd 'na lun gwych ar dudalen flaen yr Observer y diwrnod canlynol yn dangos cefnogwyr Cymru'n dathlu ... wel, heb law am fy ffrindiau oedd wedi mynd i'r ty bach a methu'r gôl!!

Os ga'i gyfle mi na'i sganio'r llun a'i roi fyny ar y blog.

Labels: , , , , , , ,

Mae mis yn amser hir ...

6.12.07
... heb gyswllt i'r we! Diolch yn fawr BT a diolch i chi am eich amynedd.
Ers i mi fod heb gyswllt i'r we mae 'na lond trol o bethau wedi digwydd.
Gemau cyfartal efo Iwerddon a'r Almaen oedd yn cynnwys trip da iawn i Frankfurt.
Yr enwau'n dod allan o'r het ar gyfer Cwpan y Byd 2010 a deja vu i Gymru.
Caerdydd mewn trafferthion ariannol ac yn ofni am fynd i ddwylo'r gweinyddwyr
Wrecsam yn ennill ... o'r diwedd ... hwwwwreeeeeee!

O ... a 'dwi wedi cael swydd newydd hefyd ... mwy am hyn a phopeth 'dwi wedi'i grybwyll uchod yn y dyddiau nesaf ...

Labels: