Blog Droed

Hynt a helynt ffan ffwtbol Cymraeg ...

Cymru v Seland Newydd

27.5.07
Yn lle canolbwyntio ar ochr negyddol (anferth) o'r gêm yma, dw i am ganolbwyntio ar yr un pwynt positif personol gwych. Yn lle cael parti diwedd tymor yn 'stafell gefn rhyw dy tafarn roeddwn i wedi trefnu bws i'r Cae Ras ar gyfer tîm dan-9 Y Fali.

Dyma'r tro cyntaf i'r mwyafrif ohonnyn nhw fod mewn gêm bêl-droed, heb sôn am gêm rhyngwladol ac roedd gweld y cyffro ar eu hwynebau'n gwneud yr holl stress o drefnu'r daith werth chweil.



Dw i off i Eisteddfod yr Urdd am yr wythnos felly na'i drio postio cyn y gêm yn erbyn Y Weriniaeth Siec, ond does na'm sicrwydd, felly tan hynny ... wela'i chi yn y 'singing section'!

Labels: , , , ,

Bring me sunshine ...

21.5.07
Llongyfarchiadau i Morecambe am sicrhau dyrchafiad i'r Gynghrair Bêl-droed wedi iddyn nhw drechu Caerwysg yn y rownd derfynol o gemau ail gyfle'r Conference ddoe.

Roedd 'na erthygl ddifyr yn yr Observer ddoe gan gefnogwr Morecambe oedd yn teithio yn ôl o Efrog Newydd - lle roedd o ar wyliau teuluol - er mwyn gwylio'r gêm.

Mae awdur y darn, David Jones, yn disgrifio ei ddyddiau cynnar yn gwylio'r Shrimps yn Christie Park (un newydd ar gyfer y clwb 92 y tymor nesaf) fel hyn:
In those days before non-league went national, the Shrimps were in the Lancashire Combination, pitted against even smaller teams (plankton?) such as rossendale United, who we once massacred 14-0, with Morecambe legend Arnie Timmins bagging eight goals. A season from now, we could be hosting Leeds United.

Dyna be ydi pêl-droed go iawn, arwr o'r enw Arnie Timmins!

Roedd y gêm can gwaith gwell na'r gêm rhwng Manchester United a Chelsea, sy'n syndod mawr o gofio beth oedd ar gael i'r buddugwyr ... neu'n hytrach, beth fyddai'r tîm oedd yn colli yn gorofd wynebu tymor nesaf - tymor arall yn y 'Blue Square' Premier.

Labels: , , ,

Prynhawn diflas yn Wembley

20.5.07
Wel pa mor siomedig oedd hwnna? Wedi'r holl heip a'r holl edrych ymlaen, 'dwi ddim yn cofio Cup Final mor ddiflas â hon.

Dwi ddim yn deall pam fod y papurau newydd wedi bod yn sôn am Dream Final rhwng Chelsea a Man Utd, wedi'r cwbwl, dydy'r gemau rhwng y ddau glwb ddim wedi bod yn glasuron o bell ffordd - welsoch chi'r 0-0 rhwng y ddau rhyw pythefnos yn ôl ...?

Gyda'r ddau dîm yn cynnwys tua £700m o dalent, mae'n anodd credu ein bod ni wedi cael 90 munud mor siomedig, ond mae gen i ofn mai dyna sut mae Chelsea'n chwarae. Yn hytrach na defnyddio'r holl chwaraewyr talentog sydd yn ei carfan, mae Mourinho yn hapus i weld ei dîm yn rhwystro'r gwrthwynebwyr a sgorio gôl wrth wrthymosod.

A dyna'n union ddigwyddodd brynhawn ddoe wrth i Didier Drogba rwydo unig gôl y gêm wedi cyfnod o bwyso gan Manchester United.

Byddai Cup Final ddim yn Cup Final heb dipyn o ddadlau a'r Cymro, Ryan Giggs, sy'n flin eleni.

Mae Giggs yn credu bod Peter Cech wedi cario'r bêl dros y llinell wedi ergyd Giggs ond y gwir amdani ydi y dylai Giggs fod wedi gwneud llawer, llawer gwell o'i gyfle.



Petai wedi sgorio fe fyddai wedi ymuno â chlwb ecsgliwsif iawn o Gymry sydd wedi codi'r Gwpan fel capten eu clwb.



Yr unig beth da yw na fu rhaid i ni ddioddef ciciau o'r smotyn!

Labels: , , , , , , , , , ,

Arwr y tymor: John McDermott

17.5.07
Wrth wylio hen dapiau Match of the Day o dymor 1991/92 wythnos diwethaf - y tymor welodd Leeds yn ennill yr hen Adran Gyntaf - mae'n gwneud i rhywun sylweddoli faint mae pêl-droed wedi newid mewn 15 mlynedd.

I ddechrau hefo hi, mae'n rhaid i mi 'sgwennu hen Adran Gyntaf neu fydd pobl ddim yn sylweddoli mod i'n sôn am yr adran uchaf yn Lloegr!

Wedi disgyn dwy adran ers 1992, mi fydd Leeds yn chwarae yn yr Adran Gyntaf y tymor nesaf a hynny oherwydd yr holl newid enwau hurt sydd wedi bod ers creu'r Uwchgynghrair.

Cafodd yr hen Ail Adran ei galw'n Adran Un am sawl blwyddyn wedi i'r hogia mawr creu eu clwb bach elitaidd. Yna, ychydig flynyddoedd yn ddiweddarach, penderfynodd y bois tipyn bach llai na'r bois mawr eu bod nhw eisiau enw snazzy hefyd ac felly cawsom ni'r Bencampwriaeth.

Oherwydd hyn mae Leeds, fydd yn chwarae yn yr hen Drydedd Adran y tymor nesaf, yn chwarae yn Adran Un!

Beth bynnag, yn y dyddiau yma o gyflogau hurt, o chwaraewyr O Ariannin, bygthiadau llys a pherchnogion o dramor, roedd yn braf clywed am gamp John McDermott.

Yn ystod y gêm rhwng Amwythig a Grimsby ar Sadwrn olaf y tymor, roedd McDermott yn gwneud ei 753in ymddangosiad i Grimsby - yr unig glwb mae o wedi ei gynrychioli yn ystod ei yrfa.

Ac wrth iddo adael y maes cafodd McDermott ei gymeradwyo gan y ddau set o gefnogwyr - cefnogwyr sydd yn deall ac yn gwerthfawrogi dyn oedd yn amlwg yn caru ei glwb ac yn amlwg yn gwerthfawrogi mai braint yw cael bod yn chwaraewr pêl-droed proffesiynol.

Mae pêl-droed yn fyw ac yn iach yn yr is-adrannau a phetai mwy o bobl yn sylweddoli hynny byddai'n llawer, llawer gwell ar bêl-droed Ynysoedd Prydain sy'n dioddef ar y funud gyda'r cefnogwyr yn methu uniaethu â chwaraewyr sydd ar gyflogau anferthol.

Pryd fydd y papurau newydd y sylweddoli nad ydi dau neu dri chwaraewr rhyngwladol Chelsea'n anafu yn 'argyfwng' a bod y rhan fwyaf ohonnom ni wedi cael llond bol ar glywed yr holl millionaires ma'n cwyno.

Labels: , ,

Woooooooooooooooohoooooooooo!!

6.5.07
Mae'r cyfraniadau i'r blog wedi bod yn brin iawn yn ddiweddar, a hynny gan mod i'n chwysu pys ac yn cachu brics dros ddyfodol Wrecsam y y gynghrair bêl-droed ... wel, does dim angen poeni ddim mwy - da ni'n saff!!

Roedd prynhawn ddoe yn brynhawn llawn tensiwn, drama, pryder, gorfoledd, poen a phleser ... a tydw i byth eisiau mynd trwy'r fath beth byth eto.

Cefais i'r fraint o weithio i Radio Cymru ar y Kop brynhawn ddoe, felly roeddwn yn sefyll ar yr union fan lle roeddwn wedi treulio'r 80au hwr a'r 90au.

Yr union fan lle roeddwn wedi gweld Wrecsam yn colli yn erbyn Henffordd a Halifax cyn gorffen ar waelod gynghrair bêl-droed; yr union fath lle roeddwn i wedi dathlu dyrchafiad o dan Brian Flynn dwy flynedd yn ddiweddarach; y darn arbennig yna o'r Kop lle nes i wylio ni'n chwalu Rotherham 7-0, lle nes i ddathlu goliau Gary Bennett a chlodfori sgiliau Karl Connolly ... beth bynnag, 'da chi'n deall be' sydd gen i, yn dydach!

Roedd yr awyrgylch ar y Kop yn drydanol gyda'r lle yn orlawn a chyda pawb yn ysu am y pwynt oedd ei angen i'n cadw ni yn y gynghrair ...

... wel, roedd y lle fel y bedd pan sgoriodd Boston, a doedd y newyddion bod Macclesfield a Notts County yn gyfartal yn fawr o gysur. Roedd yn anodd tu hwnt ceisio darlledu ond dwi'n credu bod y siom yn amlwg o dôn fy llais!

Ond o mor wahanol oedd y darlledu wedi i Ryan Valentine rwydo o'r smotyn - er, weles i ddim o'r bêl yn taro'r rhwyd, doeddwn i, na chanoedd o gefnogwyr ar y Kop, methu gwylio'r gic! Roedd dagrau'n llifo i lawr fy moch pan roeddwn yn disgrifio awyrgylch y Kop i'r genedl wedi gôl Chris Llewellyn ac wrthi Nic Parry, oedd yn sylwebu ar ran Radio Cymru, ofyn am yr ymateb wedi'r drydedd gôl, wel roeddwn i'n neidio i fyny ac i lawr fel ffwl ac yn cael clamp o sws gan un o fy ffrindiau!!

Roedd yn ddiwrnod byth gofiadwy, ond plis, plis, plis, peidiwch a gadael i ni fynd trwy hynna eto ...

Labels: , , , , , ,