Blog Droed

Hynt a helynt ffan ffwtbol Cymraeg ...

Be? Mae o 'di brifo hefyd?

31.10.06
Mae bywyd yn gallu bod yn anodd tu hwnt i gefnogwr Wrecsam, ond wedi gwylio'r fuddugoliaeth 2-0 dros Bristol Rovers ddydd Sadwrn roedd rhywun yn credu bod y tîm wedi troi'r gornel ... Yna gyda Neil Roberts a Lee McEvilly wedi anafu, Juan Ugarte dal heb ddychwelyd o Wlad y Basg a Chris Llewellyn wedi ei wahardd am dri gêm wedi ei gerdyn coch ddydd Sadwrn, daeth y newyddion bod Tom Craddock wedi anafu ei ben-glin yn ystod ei gêm gyntaf i'r clwb ar fenthyg o Middlesbrough!

Mae'n rhaid bod Denis Smith wedi torri drych tra'n cerdded ar y craciau yn y pafin o dan ystol ar ddydd Gwener y 13eg ...

Hapus fy myd?

'Dwi wedi esgeuluso'r blog yn ddiweddar, ac efallai bydd nifer ohonnoch yn credu bod hynny oherwydd sefyllfa ddifrifol Wrecsam ar y maes - un buddugoliaeth mewn naw gêm cyn y fuddugoliaeth yn erbyn Bristol Rovers ddydd Sadwrn. Ond er fy mod y poeni am berfformiadau'r tîm ar y maes - yn enwedig pan fo Denis Smith yn mynnu fod Chris Llewellyn yn ymosodwr - rwyf yn ddigon hapus fy myd o gymharu â chefnogwyr Caerdydd.

Ia, rwy'n gallu clywed yr ebychiad o fan hyn - "Ond mae Caerdydd ar frig y Bencampwriaeth, ar fin dechrau adeiladu stadiwm newydd ac yn chwarae o flaen torfeydd o 18,000 a mwy ..." medde chi. Ydi, ond mae'r clwb dros £30m mewn dyled a chyda person wrth y llyw lwyddodd i chwalu clwb llawer mwy na Caerdydd.

Cefais y ddadl yma gydag un o leisiau mwyaf adnabyddus pêl-droed Cymru ddydd Sadwrn.
"Felly ti'n dweud bod well gen ti hyn [Wrecsam yn Adran Dau a charfan fechan o chwaraewyr] na beth sydd yn digwydd ar Barc Ninian?" gofynodd. Ac mae'n rhaid mi gyfaddef mai "ydw" oedd yr ateb.

Mae Eric The Red yn gallu adlewyrchu cefndir y sefyllfa ar Barc Ninian a chwmpasu teimladau cefnogwyr Caerdydd yn llawer gwell na fi, ac mae ei flog wedi bod yn llawn erthyglau difyr tu hwnt yn ddiweddar.
Ond wrth edrych ar y sefyllfa o'r tu allan, rwy'n clywed Peter Ridsdale yn dweud ei fod wedi dysgu ei wers yn Leeds, ond eto'n sôn am fuddsoddwyr tymor byr a'r hedge funds bondigrybwyll 'ma.

Y rheswm bo Leeds mewn cymaint o dwll yw bo Ridsdale a'i griw wedi benthyg arian mawr ar sail cyrraedd Cynghrair y Pencampwyr ... ac yna wedi methu sicrhau eu lle yn Ewrop. Erbyn hyn mae Ridsdale yn crybwyll benthyg arian mawr ar sail cyrraedd Uwchgynghrair Lloegr ac incwm y stadiwm newydd ... a beth sy'n digwydd petai'r Adar Glas yn methu? Cofiwch bod Leeds yn glwb llawer mwy na Chaerdydd ac mae nhw'n ei chael yn anodd tua gwaelodion y Bencampwriaeth oherwydd y twll ariannol enfawr yn Elland Road, byddai sefyllfa debyg ar Barc Ninian yn drychinebus - ar y gorau byddai'r cefnogwyr yn gallu gobeithio bod y clwb yn parhau i fodoli yng ngwaelodion y gynghrair, ond ar y gwaethaf ... wel, pwy â wyr?

Yr X Factor

22.10.06
Mae ymgyrch wedi bod yn ddiweddar i hybu mwy o ddefnydd o'r Gymraeg ar Y Cae Ras, sy'n amlwg yn beth da, ond mae'r ymgyrch yn dod yn fwy fwy arwyddocaol erbyn hyn.

Yda chi'n cofio'r hen gwestiwn cwis:
Cwestiwn: Enwch pump o glybiau'r gynghrair sydd efo X yn eu henwau
Ateb: Halifax Town, Exeter City, Oxford United, Wrexham a Crewe Alexandra

Wrth gwrs, mae'r rhai sylwgar yn eich mysg wedi sylwi nad yw Halifax, Exeter ac Oxford yn y gynghrair bellach. Disgynodd Halifax allan o'r gynghrair yn 2002, dilynodd Exeter y Shaymen i lawr i'r Conference yn 2003 ac yna yn 2005, collodd Oxford eu lle yn y gynghrair.

Rwy'n poeni'n arw bod y patrwm yn mynd i barhau ac, yn dilyn y rhediad trychinebus diweddar, rwy'n erfyn ar swyddogion y clwb i gymryd camau cyflym i newid enw'r clwb i Glwb Pêl-droed Wrecsam cyn ei bod yn rhy hwyr!

Ffeit, ffeit, ffeit, ffeit

19.10.06
Mae John Hartson yn datgan yn ei hunangofiant, sydd allan wythnos yma, ei fod wedi cael ffeit efo rheolwr Cymru, Bobby Gould, tra'n ymarfer ar gyfer gêm Cymru â Thwrci ym mis Rhagfyr 1996.
Roedd y sesiwn ymarfer yn dod mis yn unig wedi Cymru ddioddef crasfa 7-1 yn Eindhoven - y tro cyntaf i mi deithio dramor â Chymru - ac yn ôl llyfr Hartson, cafodd ei alw allan am ffeit gan y rheolwr yng nghanol sesiwn ymarfer yng Nghasnewydd.

' 'Hold it,' he shouted at me. He had turned to face me, right in front of the other players. 'Then he said, 'Right John, you and me, let's have a fight.' I didn't know what to say or where to look. Here I was being challenged to a fight by a middle-aged bloke, who also happened to be my boss.

Mae'r stori'n hysbys ers amser maith, ond dyma'r tro cyntaf i unrhyw un o'r chwaraewyr ddod allan a chadarnhau yr hyn fo pawb wedi amau. Mae'r syniad o chwaraewyr rhyngwladol mewn cylch o amgylch dau ddyn yn cwffio yn chwerthinllyd - mae mwy fel golygfa o Grange Hill.

Yr unig beth da i ddod allan o deyrnasiad Gould â Chymru oedd y crysau eiconig "Gould Must Go ..." cafodd eu dylunio ar batrwm clawr album "Everything Must Go ..." y Manic Street Preachers, mae'n un i dal yn y ty yn rhywle.
Hefyd, mewn un gig yng Nghaerdydd, newidiodd y Manics eiriau'r gan i "Bobby Gould must go ..." ... dyddiau da!!

O lle ddaeth yr hyder?

16.10.06
Pan ddaeth yr enwau allan o'r het ar gyfer rowndiau rhagbrofol Ewro 2008 roedd nifer fawr yn hyderus byddai Cymru'n gallu herio'r Almaen a'r Weriniaeth Siec am yr ail safle yn y grwp.

"Os ydy nhw'n ildio pwyntiau yn erbyn eu gilydd ac os ydym ni'n cipio pwyntiau oddi cartref y erbyn y ddau, pwy â wyr?" oedd y gri. "Byddem ni'n siwr o gipio chwe phwynt yn erbyn Cyprus," meddai pawb gan anghofio'r golled yn Limassol llai na dau fis ynghynt.

Pam ein bod ni'n meddwl bod gwledydd dwyrain Ewrop a gweldydd yr hen Undeb Sofietaidd yn hawdd eu curo? Oes neb yn cofio Moldova 3-2 Cymru, Georgia 5-0 Cymru, Belarw 2-1 Cymru, Armenia 2-2 Cymru neu Azerbaijan 1-1 Cymru?
Roedd yr un agwedd yn amlwg cyn y gêm â Slofacia wythnos diwethaf. "Duwcs fe ddylwm ni guro rhain." Pam? pam ar y ddaear ein bod ni'n meddwl bod tîm sydd â chwarewyr o bedwaredd adran cynghrair Lloegr yn debygol o drechu tîm sydd â chwaraewyr o FC Nuremburg, Lokomotiv Moscow, Zenit St Petersburg a Rangers yn eu mysg?

Mae’n anodd dweud hyn, ond y gwir amdani yw mai gwlad fechan di-bwys ydi Cymru yn y byd pêl-droed. Ydi, mae’n wir bod modd creu sioc nawr ac yn y man - fe lwyddodd y tîm i guro’r Eidal yn Stadiwm y Mileniwm yn 2002 ac fe drechwyd Yr Almaen a Barc yr Arfau yn ystod gemau rhagbrofol Ewro 1992, ond mae’n rhaid cofio beth oedd canlyniadau’r ddwy gêm oddi cartref – chwalwyd Cymru 0-4 ym Milan a threchwyd tîm Terry Yorath 1-4 yn Nuremburg.

Pumed detholyn yn y grwp yw Cymru, tu ôl i’r Almaen, Y Weriniaeth Siec, Iwerddon a Slofacia, felly oni fyddai gorffen yn bedwerydd yn y grwp yn lwyddiant ...?

Ydi Tosh yn gwylio?

13.10.06
Joga Bonito, Llansannan - Gwych!

Paul Robinson - aelod diweddaraf yr Orsedd

Tydw i ddim yn un sydd yn chwerthin ar broblemau pobl eraill fel arfer ... ond ...

Yr Express oedd â'r pennawd orau y bore wedi buddugoliaeth Croatia



A dyma'r digwyddiad ... eto!

'Dwi'n caru Cymru

Rwy'n casau'r A470 ... ond 'dwi yn caru Craig Bellmay, Rob Earnshaw a Jason Koumas, Guinness, Hen Wlad Fy Nhadau, John Toshack, Gwyr Harlech, Richard Duffy, lympiau mewn caeau yng Nghroatia, Gareth Bale, Bing-bong-a-bing-bong-be, Danny Gabbidon, Yr Wcrain, Lewis Price, casinos Les Croupiers - yn enwedig y bwrdd roulette, Simon Davies, Slavan Bilic, Dau Gi Bach yn Mynd i'r Coed, Carl Robinson, pastîs caws a nionyn, y City Arms, Stryd Caroline, Lewin Nyatanga, Can't Take My Eyes Off You, cheesy-chips efo beans, Richard Duffy, Pwy Sy'n Dwad Dros y Bryn yn Ddistaw, Ddistaw Bach ... a buddugoliaethau annisgwyl.

Mam bach!

9.10.06
Wel, lle uffar mae rhywun yn dechrau? 5-1 ... 5 blydi 1 ... yn erbyn tîm fyddai'r rhan fwyaf o gefnogwyr Cymru'n ei chael yn anodd i ddarganfod ar fap.

5-1?? Blymin 'eck ... Wel, dyma gyfaddefiad cyn i ni ddechrau - nes i adael cyn y diwedd. Am y tro cyntaf erioed nes i adael cyn chwiban olaf y dyfarnwr - nes i weld y chwe gôl, ond nes i ddim gweld y deng munud olaf.

Y cwestiwn cyntaf sydd rhaid ei ofyn yw be goblyn oedd ar ben Paul Jones yn cael y fath steil gwallt - mae'r boi yn hyn na fi! Mae golwyr yn debygol o gael eu ceryddu ddigon gan y cefnogwyr fel mae, heb iddynt fynd a rhoi rheswm i'r cefnogwyr eu gwawdio.

Roedd Richard Duffy yn warthus a byddai Rob Edwards wedi bod yn fwy defnyddiol petai wedi eistedd drws nesaf i mi yn rhes 17 o'r Stand Gogleddol. Mae Gareth Bale yn cael ei esgusodi oherwydd ei gôl wych a'i ymosodiadau bendigedig i lawr y chwith yn yr hanner cyntaf.

Heb unrhyw uchder yn y llinell flaen roedd yr holl symudiadau celfydd i lawr yr esgyll a'r peli hyfryd i'r cwrt cosbi yn wastraff llwyr - yn anffodus ni fydd Hartson ar gael nos Fercher felly mae'n anodd gweld sut bydd Tosh yn newid pethau cyn herio tîm drechodd Iwerddon 5-2 nos Sadwrn.

Giggs yw chwaraewr y flwyddyn

3.10.06
Ryan Giggs sydd wedi ennill tlws Chwaraewr y Flwyddyn Cymru 2005, ond mae'n rhaid cyfaddef nad yw'n sioc aruthrol ... pwy arall fyddai wedi gallu ennill y wobr ...?

A dweud y gwir, mae'n adlewyrchiad anferth o safon carfan diweddaraf John Toshack mai ymysg y chwaraewyr ifanc oedd y frwydr mwyaf am wobr Chwaraewr Ifanc y Flwyddyn.
Lewin Nyatanga gipiodd y wobr ond roedd nifer yn awgrymu mai Gareth Bale fyddai'n ei hennill ac mae'n rhaid i mi gyfaddef mai Joe Ledley gafodd fy mhleidlais i.
Do, fe lwyddodd Nyatanga i sefydlu record newydd am fod y chwaraewr ieuengaf i ennill cap dros Gymru ym mis Mawrth, a do, fe dorrodd Bale y record dau fis yn ddiweddarach. Ond mae Ledley wedi sefydlu ei hun yn nhîm Caerdydd ac mae'n chwarae o wythnos i wythnos yn y Bencampwriaeth. Yn anffodus, nid yw Nyatanga a Bale wedi cael y fath effaith yn Derby County a Southampton.

Roeddwn yn falch iawn o glywed mai Mark Jones gipiodd y wobr i Chwaraewr o Glwb Cymreig. Mae ei berfformiadau dros Wrecsam wedi bod yn wych ac mae ei ddylanwad ar Y reigiau'n anferthol - gobeithio gall ddathlu'r wobr â chap yn erbyn Slofacia neu Cyprus!

Bonjour

2.10.06
Wel, rwyf wedi dychwelyd o Ffrainc, ond beth sydd wedi digwydd yn y byd pêl-droed yn ystod yr wythnos fues i dramor?
Mae Robert Page wedi ymddeol o bêl-droed rhyngwladol er, mae'n rhaid mi gyfaddef mod i'n meddwl ei fod eisoes wedi ymddeol! Yn anffodus i Gymru, mae James Collins, Mark Delaney a Sam Ricketts wedi anafu sydd yn golygu mai Danny Gabiddon fydd yr unig un o'r pedwar amddiffynnwr wynebodd Y Weriniaeth Siec sydd yn holliach i herio Slofacia a Chyprus.

Y newyddion mawr arall ydi bod Hotspur Caergybi drwodd i drydedd rownd Cwpan Cymru yn dilyn buddugoliaeth wych dros Llangefni Sadwrn diwethaf. Bydd Hotspur yn herio Llanandras am le yn yr 16 olaf ar 4 Tachwedd.