Blog Droed

Hynt a helynt ffan ffwtbol Cymraeg ...

FK Suduva

29.7.06

FK Suduva
Originally uploaded by blogdroed.

Lluniau FK Suduva v Y Rhyl

Ar y ffôn o Lithuania ...

Rwyf newydd ddychwelyd o Lithiwania a gêm ail gymal Y Rhyl â Suduva, a dyna'r rheswm dros y diffyg postio dros yr wythnos diwethaf ... doedd dim modd cysylltu â'r we fyd eang yn Kaunas, yn wir, roedd yn amhosib cysylltu â'r BBC yng Nghardydd diolch i fethiant Lithuania Telecom!

Dydd Mawrth
Bu rhaid i mi adael Sir Fôn am 0200 er mwyn ymuno â thîm Y Rhyl ym maes awyr Manceinion a dal awyren i Amsterdam. Wedi awr yn yr Iseldiroedd cawsom ein hunain ar awyren fechan i Riga, Latfia lle roedd bws a phum awr o siwrne yn ein disgwyl er mwyn cyrraedd Kaunas.
Roedd pawb yn falch o gyrraedd y gwesty nos Fawrth er mwyn cael tipyn bach o gwsg, ond yn anffodus, roeddwn digon effro i golli llwyth o Litas ar y roulette yng nghasino'r gwesty!

Dydd Mercher
Cawsom ymweld â stadiwm FK Suduva ym Marijanpole am y tro cynta ac roedd siom enfawr yn fy nisgwyl - nid oedd y linell ISDN sydd ei angen i ddarlledu yn gweithio ... bu rhaid disgwyl am beirianydd o Lithuania Telecom, ac wedi pedair awr o drafod gyda'r naill yn deall iaith y llall, bu rhaid i mi adael am y gwesty heb lwyddo i ddarlledu.

Dydd Iau
Bu rhaid i mi fynd i'r stadiwm erbyn 1300 brynhawn Iau (5 awr cyn y cic gyntaf) er mwyn ceisio sortio'r llinell ISDN - yn anffodus, ni ddaeth y peirianydd tan 1530 felly am ddwy awr a hanner bu rhaid i mi wrando ar cd Lithuanian-pop yn chwarae drosodd a throsodd ar yr uchelseinydd ac yna am ddwy awr a hanner arall bum yn croesi pob bys a chyffwrdd pob darn o bren wrth i'r peirianydd geisio trwsio'r llinell ISDN ... ond ni weithiodd a bu rhaid i mi wneud pob darllediad ar y ffôn!

Yn anffodus i'r Rhyl, roedd y dyfarnwr i'w weld yn anwybyddu taclo ffyrnig y tîm cartref a roedd y Cymry'n mynd yn fwy fwy rhwystredig. Ildiwyd dwy gôl gynnar ac roedd hynny'n golygu bod mynydd o dasg yn wynebu'r Rhyl. Cafwyd llygedyn o obaith wrth i Andy Moran rwydo gôl yn yr ail hanner, ond methodd Alex Hay, Marcus Orlick a Lee Hunt gyflon euraidd i ddod â'r Rhyl yn gyfartal.
Ond cafwyd cwmwl du enfawr ar y gêm pan glydwyd Chris Sharp i'r ysbyty wedi iddo dorri dau asgwrn yn ei goes - pob dymuniad da i Sharpy a gobeithio ei fod bellach ar ei ffordd adref.

Dead keen

20.7.06
Mae clwb pêl-droed Hamburg yn Yr Almaen ar fin agor mynwent ar gyfer eu cefnogwyr!

Mynd rownd y bars â Baros

Mae'r rhan fwyaf o chwaraewyr Aston Villa wrthi'n ddygn yn ceisio sicrhau eu dyfodol â'r clwb yn dilyn digwyddiadau'r wythnos diwethaf sydd wedi gweld David O'Leary yn gadael y clwb.

Ond mae un o'u sêr, Milan Baros, wedi bod ar y pop yn Prague gan ddawnsio â chiondom yn ei wallt, achosi ffrae mewn parti priodas a chael ei daflu allan o glwb nôs trendy!

O.N.
Mae yna luniau o'r noson yma

Mandela United

Cafodd Manchester United y fraint o gyfarfod Nelson Mandela yn ystod eu taith i Dde Affrica ac fe'i gyflwynwyd â chrys Manchester United gyda MANDELA a 'r rhif 88 ar y cefn - anrheg hwyr wedi iddo ddathlu ei benblwydd yn 88 ddydd Mawrth.

Pa mor hir cyn fydd y crys a ebay? A 'sgwn i os gafodd Ryan Giggs y cyfle i ofyn i Mr Mandela arwyddo ei hoff lyfr ...?

Cyn agor dy geg ...

... mae'n werth meddwl am yr hyn rwyt ar fin ei ddweud.

Dyma ddywedodd llefarydd ar ran Clwb Pêl-droed Shenyang Ginde wedi llawfeddygon fethu ag achub golwg chwaraewr canol cae Guinea, Ousmane Bangoura, wedi damwain yn ystod gêm:

"We never wanted to see this happen."

TNS allan o Ewrop ... eto

Colli 1-0 oedd hanes Y Seintiau Newydd neithiwr yn erbyn MyPa o'r Ffindir ac yn wir, roedd yn fuddugoliaeth go gyfforddus i'r tîm o'r Ffindir. Bu rhaid chwarae'r gêm yn Y Drenewydd oherwydd nad yw maes Y Seintiau yn cyrraedd safon Uefa ond roedd yn braf gweld torf digon parchus ar Barc Latham.

Yn anffodus i'r dorf, methodd Y Seiniau â phrofi golwr MyPa fwy nag unwaith trwy gydol y gêm - ac mae hynny'n cynnwys cic o'r smotyn aeth heibiio'r postyn yn y funud olaf ac maent yn mynd allan o'r gystadleuaeth 2-0 ar gyfanswm goliau.

Wedi'r gêm roedd rheolwr Y Seintiau, Ken McKenna, am weld tymor pêl-droed Cymru yn cychwyn yn gynt er mwyn caniatau'r timau sy'n cystadlu yn Ewrop i gael hanner dwsin neu fwy o gemau i baratoi ar gyfer cystadlaethau Uefa.

Ydi, mae pêl-droed yr haf yn rhywbeth byddwn i yn ei ffafrio am amryw o resymau - dim ond un rheswm yw paratoi ein timau ar gyfer Ewrop - ond y gwir amdani yw fod Y Rhyl, Caerfyrddin a bellach LLanelli wedi llwyddo i ennill gemau yn Ewrop cyn i'r tymor gychwyn, ac fe ddylai clwb sydd yn gwbl broffesiynol fel Y Seintiau lwyddo i drechu tîm fel MyPa oedd, a bod yn hollol onest, yn un digon cyffredin.

Gefle IF 1-2 Llanelli

18.7.06
Roedd yn fuddugoliaeth mor fendigedig ag yr oedd yn annisgwyl wythnos diwethaf pan drechodd hogia tre'r Sosban eu gwrthwynebwyr o Sweden 2-1 yn Stadiwm Rasunda.

Cyn y gêm roedd fy nghyfaill o Sveriges Radio (ac ia, cyn i chi ofyn, Bjorn oedd ei enw!) yn hyderus, yn enwedig wedi iddo glywed nad oedd yr un o chwaraewyr Llanelli yn chwaraewr rhyngwladol. "Be? 'Does yr un ohonynt efo cap?" gofynnodd Bjorn wrth i mi redeg trwy dîm Llanelli ar ei ran. Mae ymosodwr Gefle, Kristen Wiikmae, rwydodd gôl y tîm cartref, wedi ennill 100 o gapiau dros Estonia tra bo'u hasgellwr o'r Congo, René Makondele, wedi ennill 15 o gapiau.

Yn yr hanner cyntaf roedd Gefle'n edrych yn gryfach ac yn gynt na Llanelli ac roedd y Cochion yn ffodus i beidio bod ar ei hôl o fwy nag un gôl. Bjorn oedd yn uchel iawn ei gloch wrth i ni fwynhau panad a bisged yn lolfa VIP y Rasunda, ond roedd yn stori dra gwahanol wedi'r egwyl.

Fe weddnewidiwyd y gêm wedi Peter Nicholas yrru'r Sbaenwr, Jacob Mingorance, i'r maes. Roedd yr eilydd yn ysbrydoliaeth i'w gyd-chwaraewyr ac wedi Rhys Griffiths rwydo i ddod â Llanelli'n gyfartal, cafwyd chwip o gôl unigol gan Mingorance wedi iddo ddawnsio trwy amddiffyn Gefle cyn rhwydo.

Mae'r gobeithion yn uchel ar gyfer yr ail gymal ar Barc y Strade wythnos nesaf, ond fel dywedodd Peter Nicholas wrtha'i wedi'r gêm ... "It's only half time"!

Dim lliw na llun ...

Roeddwn wedi gobeithio rhoi linc i fy nghyfrif flickr er mwyn i chi gael gweld fy lluniau o fuddugoliaeth bendigedig Llanelli yn Stockholm wythnos diwethaf, ond yn anffodus, diolch i rhyw berson bach dan-dîn, nid oes gennyf yr un llun. Yn wir, nid oes gen i gamera bellach wedi rhyw f@$t@rd ei ddwyn o lloc y wasg!

Eric the Red yn ei ôl

16.7.06
Dathlwch ac addolwch ond byddwch ofalus o'ch cider ... mae Eric The Red yn ei ôl!

I'r rhai ohonnoch sydd yn cofio'r rhyngrwyd yn ei ddyddiau cynnar, Eric yw tad y safleoedd pêl-droed Cymreig, roedd ei safle bêl-droed Cymreig yn un ysbrydolodd fi i greu safle A470 (sydd wedi bod yn cael ei hail-adeiladu ers bron i ddwy flynedd bellach ...!!)

Mae Eric yn un o gefnogwyr mwyaf ffyddlon Cymru, Caerdydd a Bangor ac mae'n dda gweld ei gyfraniadau yn ôl ar y we fyd eang!

Popeth drosodd am bedair blynedd arall

Wel, mae Cwpan y Byd drosodd am bedair blynedd arall a chyda popeth wedi ei ddweud am beniad Zidane a buddugoliaeth Yr Eidal tra bo fi'n cael problemau cyfrifiadurol, mae'n siwr nad oes pwrpas i mi 'sgwennu unrhywbeth arall erbyn hyn!

Ond rhag ofn nad ydych wedi eu gweld, mae cyfres o luniau bendigedig gan y ffotograffydd o Gymro, Gari Wyn Williams, ar BBC Cymru'r Byd.

Mae Gari yn byw yn Yr Eidal a bu allan ar y strydoedd yn cynmryd lluniau'r Eidalwyr yn dathlu buddugoliaeth Yr Azzurri ar eu Vespas!

Roberto Carlos yn ymddeol

4.7.06
Mae amddiffynwr Brasil, Roberto Carlos wedi ymddeol o bêl-droed rhyngwladol.

Er iddo ennill Cwpan y Byd â Brasil gan chwarae dros ei wlad 125 o weithiau ac er ei fod wedi ennill Cynghrair y Pencampwyr â Real Madrid dair gwaith, mae un eiliad arbennig yn llamu i'r cof wrth glywed ei enw - y gic rhydd odidog yn y Tournoi de France ym 1997, felly dyma hi:

Mynd o ddrwg i waeth ...

Mae'r Sun yn crafu gwaelod y gasgen heddiw gyda'u fendeta yn erbyn chwaraewr canol cae Portiwgal a Manxchester United, Ronaldo.

RACEHORSE owner Gary Martin had a colt gelded in revenge over the Portuguese winker — because its name is Ronaldo.


Tydi'r Saeson yn bobl hurt 'dwch?

Dwi'n gwybod lle mae o ...

3.7.06
Yn y Sun heddiw:

Wayne and fiancée Coleen McLoughlin, 20, flew back from Germany separately yesterday.

Aides said she had a long-standing arrangement to be back in Britain today.

The couple were together at home last night.

Ronaldo was in hiding.


Wel a bod yn onest, dwi'n credu bod Ronaldo yn ymarfer â charfan Portiwgal yn Yr Almaen!

Pwy sydd ar fai?

Mae Lloegr wedi cyrraedd yn ôl o Gwpan y Byd wedi coli ar giciau o'r smotyn yn erbyn Portiwgal ddydd sadwrn ... ond mae'n rhaid i'r Saeson weld bai ar rhywun (h.y. unrhyw un heb law am y Saeson eu hunain).

Mae'r Sun yn gweld bai ar Cristiano Ronaldo gan roi llun ohono ar fwrdd dartaiu ar eu tudalen flaen ac maent yn adrodd bod Wayne Rooney am ei "dorri yn hanner" yn sesiwn ymarfer cyntaf Manchester United.

Ond y gwir amdani yw fod Lloegr wedi chwarae'n sal trwy gydol y bencampwriaeth. Fe ddylai'r Saeson fod yn cyrraedd y rowndiau cynderfynol heb unrhyw drafferth o gofio'r safon sydd yn eu carfan, ond nid oedd eu perffromiadau'n ddigon da.

Cyn beio Ronaldo fe ddylai'r Sun ofyn pam bo David Beckham wedi methu tanio - wedi methu croesi yr un pêl o safon - wedi methu codi unrhyw gic rhydd na chic cornel i'r cwrt cosbi. Pam na chafwyd unrhyw berfformiad o safon ga Frank Lampard wedi tymor bendigedig dros ei glwb? Lle oedd Steven Gerrard? Pam na chafodd Aaron Lennon nag Owen Hargreaves gyfle i brofi eu bod yn haeddu chwarae yn yr XI cyntaf?

Saeson - doedd eich tîm ddim digon da - nid Ronaldo sydd ar fai ond eich sêr honedig!