Blog Droed

Hynt a helynt ffan ffwtbol Cymraeg ...

Eintracht Farmtrack

30.9.04
Ddim yn noson cystal i Eintracht Farmtrack neithiwr ag yr oedd nos Fawrth.
Ildiodd Chelsea gôl felly dim ond 2 bwynt gafodd Petr Cech a methodd Arsenal (a Reyes) sgorio'r goliau roedd pawb yn ddisgwyl yn erbyn Rosenborg.

www.uefa.com

Bog Off Alex Hamilton

29.9.04
Yda chi'n cofio darllen am ymgyrch Ymddiriedolaeth Cefnogwyr Wrecsam i achub y Cae Ras?
Wel ar raglen Week In Week Out ar BBC Cymru neithiwr cafwyd cadarnhad o'r hyn fo'r ymddiriedolaeth a ffansîn y Dismal Jimmy wedi bod yn ddweud ers misoedd.
Mae Alex Hamilton y gwneud ei orau glas i geisio cau'r clwb er mwyn datblygu'r tir.
Mae o wedi hysbysu'r clwb eu bod yn gorfod gadael Y Cae Ras ar ddiwedd y tymor - fo sydd berchen y maes.
Mae angen rhoi stop ar hyn ac mae angen i holl bobl gogledd Cymru (a Chymru gyfan) i lobio eu haelodau seneddol ac aelodau cynulliad.

Dyma'r atebion rwyf wedi dderbyn hyd yma:

Annwyl Mr. Pritchard,
Diolch am eich neges.
Dwi'n gwbl gefnogol i'r ymgyrch i gadw tim peldroed Wrecsam
yn ei gartre presenol ar y Cae Ras, ac fe wnaf yr hyn a allaf
i'w gynorthwyo.

Yn gywir,
Ieuan Wyn Jones AC
Ynys Môn


Annwyl Gary Pritchard,
Diolch ichi am eich e-bost dyddiedig dydd Sul 11 Gorffennaf at y Gweinidog dros Ddiwylliant, y Gymraeg a Chwaraeon, Alun Pugh AC. Gofynnwyd i mi ei ateb.

Byddwch yn deall mai cwmnïau cyfyngedig yw clybiau pêl-droed (mae nifer fechan ohonynt yn gwmnïau cyfyngedig cyhoeddus sy’n cael eu rheoleiddio mewn ffordd wahanol) a bod ganddynt yr un cyfrifoldebau ag unrhyw gwmnïau cyfyngedig a busnesau eraill o ran rheoli eu busnesau.

Y gwahaniaeth, wrth gwrs, yw bod llawer iawn o bobl yn dilyn clybiau pêl-droed a bod pobl yn y gymuned leol yn teimlo eu bod yn ‘berchen’ ar y clwb. Yn naturiol, felly, mae yna lawer iawn o ymwybyddiaeth a phryder cyhoeddus pan fo clwb pêl-droed mewn trafferthion ariannol.

Mae’r Gweinidog yn ymwybodol iawn o hynny, yn rhannu eich pryderon, ac yn deall pa mor bwysig yw clwb pêl-droed Wrecsam a’r Cae Ras i chwaraeon yng Nghymru yn lleol, yn rhanbarthol ac yn genedlaethol. Mae wedi gofyn i’r holl asiantaethau perthnasol gan gynnwys yr Awdurdod Lleol, Cyngor Chwaraeon Cymru ac Awdurdod Datblygu Cymru ei hysbysu’n llawn am yr holl ddatblygiadau diweddaraf.

Diolch ichi unwaith eto am eich llythyr.
Yn gywir

Ross Matthews
Yr Uned Polisi Chwaraeon
Llywodraeth Cynulliad Cymru


Rwyf hefyd wedi cael ebost o gefnogaeth gan AS Ynys Môn, Albert Owen, sydd wedi arwyddo cynnig cynnar yn y Ty Cyffredin yn cefnogi'r ymgyrch i gadw Wrecsam ar Y Cae Ras.

Beth allwch chi wneud?
1) Dewch i'r Cae Ras
2) Ymunwch â'r Ymddiriedolaeth
3) Ysgrifennwch at eich AS ac AC lleol

Peidiwch, da chi, ac eistedd ar eich tinau a gwneud dim tan ei fod yn rhy hwyr!

Aye Aye Roy Makaay

28.9.04
Woohooo!
Noson wych i mi â fy nhîm fantasy Champions League. Llwyddodd Eintracht Farmtrack i sgorio 46 pwynt nos Fawrth a hynny er gwaetha'r ffaith fod y rhan fwyaf o'r tîm yn chwarae nos Fercher.
Mae'r diolch yn bennaf i Roy Makaay o glwb Bayern Munich lwyddodd i sgorio 17 pwynt trwy rwydo tair gôl a chreu'r pedwerydd wrth i'r Almaenwyr chwalu Ajax.
Ychwanegwyd mwy o bwyntiau gan Ruud van Nistelrooij am iddo sgorio gôl ac am greu gôl wrth i Man Utd chwalu Fenerbhace 6-2. Gan mai Ruud yw capten fy nhîm, mae'r 9 pwynt yn cael eu ddyblu i 18.
Reit ta, ymlaen at nos yfory a gobeithio na fydd Chelsea'n ildio gôl - Petr Cech sydd yn y gôl - a gobeithio am goliau gan Lampard, Vicente a Reyes.

Uefa Champions League Fantasy Football

Ha! Ha!

Ai fi oedd yr unig un oedd â gwen mawr ar fy ngwyneb wrth weld Balckburn Rovers yn colli yn erbyn Charlton Athletic neithiwr?
Bai y dyfarnwr am beidio rhoi cic o'r smotyn i Rovers medd Hughes ... ha! ha!

Hughes yn anhapus â'r dyfarnwr

Prynhawn siomedig

26.9.04
Wrecsam 0-3 Sheffield Wednesday

Crap - yr unig air sydd angen er mwyn disgrifio perfformiad Wrecsam prynhawn ddoe.

Dewch â ffrind i'r Cae Ras

24.9.04
Wrecsam v Sheffield Wedneday
Mae Ymddiriedolaeh Cefnogwyr Wrecsam wedi galw ar bobl i fynd â ffrind â nhw i'r Cae Ras fory ar gyfer y gêm yn erbyn Sheffield Wednesday.

Bydd y bych (Ifan) a minnau'n gwneud y daith ar hyd yr A55 wrth i Ifan wneud ei bedwerydd ymddangosiad ar Y Cae Ras.

Mae'n siom cyn lleied yw niferoedd y dorf ar y Cae Ras eleni, yn enwedig o gofio ein bod yn chwarae pêl-droed da ac yn 8ed yn y gynghrair a chyda gêm wrth gefn fyddain ein gweld yn mynd i'r 3ydd safle petawn yn ei hennill.

Mae pob math o drafferthion oddi ar y maes (gweler yr archif) a byddai'n ofnadwy petai Wrecsam yn gorfod gadael y Cae Ras ar ddiwedd y tymor gyda miloedd ar filoedd yn troi allan i weld y gêm olaf heb fod wedi mynychu yr un gêm arall yn ystod y tymor.

Gwyrdd yw'r lliw!

Beth sydd yn aros yn eich cof wrth gofio Brain Clough? Mae'n debyg fod canoedd o gefnogwyr Nottingham Forest yn meddwl mai'r crys chwys gwyrdd roedd Clough yn enwog am ei wisgho yw'r un peth sydd yn aros yn y cof.
Mae cfnogwyr Forest wedi heidio i brynnu'r crysau chwys er mwyn ei gwisgo ar gyfer y gêm â West Ham ddydd Sul.

Stori ar safle we Ar y Marc

Be mae rhywun i fod i wneud ...?

23.9.04
Rargian annwyl, be sydd yn mynd ymlaen ar y we fyd eang heddiw?
Yn gyntaf mae negesfyrddau Dragon Soccer* a One Touch Football yn cau i lawr - y cyntaf oherwydd trafferthion technegol a'r ail oherwydd ei fod yn symud i safle newydd - ac yna, yn waeth nac unrhyw beth arall, mae Maes-e yn cau i lawr.

Bydd rhaid i mi weithio fory os nad ydw i'n ofalus!

*Nodyn - Phew! - mae Dragon Soccer yn ôl.

Penblwydd hapus Ceefax

Sawl gwaith yda chi wedi brysio i'r ty er mwyn troi at dudalen 302 o Ceefax, neu wedi troi at 309 i gael manylion chwaraeon Cymru?

Neu ella, fel fi, 'da chi wedi bod yn ddigon trist i wylio gêm 90 munud ar Ceefax tra'n annog y sgôr i newid wrh i'r dudalen symud o 1/3 i 2/3 ac yna yn ôl i Wrecsam sydd, ar gyfer gemau cartref, ar dudalen 3/3!!

Wel, mae Ceefax yn 30 mlwydd oed heddiw!

Brian Clough yn marw

20.9.04
Mae un o gymeriadau mwyaf y gêm, Brian Clough, wedi marw yn 69-mlwydd-oed.

Stori BBC Cymru'r Byd

Mae Clough yn enwog am fod yn ecsentrig ond mae'n rhaid cofio iddo lwyddo i enill Cwpan Ewrop dwy flynedd yn olynol â thîm gymharol fechan fel Nottingham Forest.
Mae'r dyddiau o weld timau tebyg yn cystadlu ym mhrif gystadleuaeth Ewrop wedi hen ddiflannu, ac mae hynny'n bechod mawr.

Ond bydd rhywun yn cofio Old Big 'Ed, fel y gelwir ei hyn wedi iddo gasglu'r OBE, am ei ffordd unigryw o reoli a delio â'r wasg.

Mae fy hoff ddyfyniad gan Clough yn dod wrth iddo wneud sylw yn ystod yr 80au hwyr, ar y tueddiad i dimau chwarae'r bêl hir:
"If God had wanted us to play football in the clouds, he'd have put grass up there."



Brian Clough
(1935-2004)
Heddwch ei Lwch.


Pêl-droed Sbaen

Mae'n llawer gwell gen i bêl-droed Sbaen a'r Almaen na'r sothach Serie A.
Os ydydch chi'n ffan o La Liga, mae safle we Soccer Spain yn wych.

Gyda llaw, mae Jose Antonio Camacho wedi ymddiswyddo fel rheolwr Real Madrid.

TV debut

19.9.04
Caersws 4-1 Aberystwyth

Do, wir, cefais fy tv debut ddoe wrth sylwebu ar y gêm rhwng Caersws ag Aberystwyth ar gyfer Y Clwb Pêl-droed. *
Roedd yn brofiad dra wahanol i sylwebu ar y radio - mae rhywun yn tueddu i siarad ormod ar y tv yn lle gadael y lluniau ddweud y stori:
e.e. "Pêl hir gan Venables i lawr yr asgell chwith a Marfell yn gwneud yn dda i'w gasglu ar ei fron ..." - wel, mae'n amlwg o'r lluniau ei fod yn bêl hir i lawr y chwith, ac mae hefyd yn amlwg fod Marfell wedi ei gymryd ar ei fron - doh!

Gobeithio byddai'n cael cyfle eto cyn bo hir!


*(bydd rhaid i mi ychwanegu'r Rec at fy rhestr o feysydd hefyd)

Hughes wedi mynd

16.9.04
Mae Mark Hughes wedi ei benodi'n reolwr Blackburn.

Stori BBC Cymru'r Byd

Tydw i ddim yn rhy siomedig, ond rwy'n pryderu am yr enwau sydd y cael eu crybwyll fel olynydd - Bobby Robson? George Graham??

Sparky'n mynd?

15.9.04
Er dweud nad oedd am droi ei gefn ar ei wlad, mae'n debyg fod Mark Hughes am adael ei swydd fel y rheolwr cenedlaethol er mwyn cymryd yr awenau â Blackburn Rovers.

Allai'm dweud fy mod i'n poeni'n ormodol gan fod ei dactegau ar y maes wedi bod yn rhai gwan iawn byth ers gêm Serbia oddi cartref.

Ydi, mae o wedi codi safon a phroffesiynoldeb yr FAW oddi ar y maes, ac roedd angen gwneud hynny, ond nid yw ei record ar y maes â Chymru mor ddisglair a mae rhai yn ei feddwl. Oni bai am y fuddugoliaeth wych yn erbyn Yr Eidal, dim ond Azerbaijan (ddwywaith) a'r Ffindir wyddodd Cymru i drechu yng ngemau rhagbrofol Ewro 2004.

Record Mark Hughes â Chymru
Ch 33 E 10 Cyf 15 Coll 9

Ac ar ben hyn, mae Cymru wedi mynd 9 gêm ragbrofol heb ennill gêm - y tro diwethaf i ni ennill gêm gystadleuol oedd yn erbyn Azerbaijan ar 29 Mawrth, 2003.

Y cwestiwn mawr, rwan, yw pwy fydd yn olynu Hughes?

Crap, crap, crap, crap, crap

12.9.04
Cymru 2-2 Gogledd Iwerddon

Wel os oedd nos Sadwrn yn siomedig, roedd neithiwr yn shambls llwyr.
Roeddwn i wedi glanio'n Manceinion am 17:30 nos Fawrth ac wedi gyrru'n syth i'r brifddinas er mod i'n dioddef yn uffernol o Baku Belly!

Wrth fwynhau peint bach distaw â rhai o'm ffrindiau nos Fawrth, roeddem wedi cysuro'n hunain na all y tîm berfformio mor sâl am yr eildro mewn wythnos - wel roedd hynny'n wir ... rowedd y tîm yn waeth byth!

Pob clod i gefnogwyr Gogledd Iwerddon, roeddent yn wych, gan ddangos i'r Cymry pathetig sut mae cefnogi tîm. Mae awyrgylch Stadiwm y Mileniwm yn haeddu nodyn ei hun gan ei fod fel llyfrgell am y rhan fwyaf o'r gêm, a tydi hyn ddim yn beth newydd.

Roedd yn amlwg i dîm Gogledd Iwerddon gael eu hysbrydoli gan y swn oedd yn dod gan eu 5,000 o gefnogwyr wrth iddynt lwyddo i chwarae'n well na Chymru a hynny efo 9 dyn i gymharu â 10 o Gymry.

Mae Mark Hughes yn dweud nad yw popeth ar ben, ond bydd angen lot fawr o lwc os ydym am gyrraedd yr Almaen a Chwpan y Byd 2006 bellach.
O leiaf cawn fwynhau'r tripiau heb orfod poeni am lwyddo!

Adroddiad BBC Cymru'r Byd

Baku'n yr USSR

7.9.04
Azerbaijan 1-1 Cymru
Mwy am y gêm yn y man, ond yn gyntaf, beth am Baku?

Roedd y ddinas ychydig yn wahanol i'r hyn welsom dwy flynedd yn ôl.
Ond wrth i ni wibio o'r maes awyr mewn Lada rhydlyd heb wregys diogelwch ar gyflymder o dros 80 m.y.a. gan osgoi tyllau anferthol yn y prif drafforth, roedd yn amlwg fod rhai pethau yn union yr un fath!

Mae Baku'n ddinas ddifyr dros ben gan ei fod yn gymysgedd o'r hen Undeb Sofietaidd a'r Dwyrain Canol. Azerbaijan yw'r unig wlad yn y byd heb law am Iran sydd ag Islamaeth Shi'ite fel eu crefydd swyddogol ond mae'r wlad yn dra wahanol i ffwndamentaliaeth Chwyldro Islamaidd Iran.
Ble arall yn y byd gallwch i fwynhau peint o gwrw mewn bar Gwyddelig cyn mynd am dro rownd y gornel ac ymweld â hen ddinas sy'n dyddio yn ôl i'r 7ed ganrif cyn Crist?

Ond, dwy flynedd yn ôl roedd twristiaid yn bethau od, a roedd pawb yn hynod falch ein bod wedi trafferthu ymweld â'u gwlad. Eleni roeddent ychydig fwy 'streetwise' gyda'r gyrrwyr tacsi yn codi llawer iawn mwy o ddoleri am pob taith a chyda pherchnogion y stondinau farchnad yn codi eu prisiau ar gyfer y dynion rhyfedd mewn trowsusau byr a choesau gwyn!

Lluniau'r daith

Grwp arall o bobol sydd llawer mwy 'streetwise' erbyn hyn yw tîm pêl-droed y wlad.
Tydw i ddim am fynd i ormod o fanylion am y gêm - roedd yn ddigon anodd ei wylio'r tro cyntaf - ond teg yw dweud bod y cefnogwyr i gyd wedi eu synnu i weld Gabbidon yn chwarae fel cefnwr chwith, yn enwedig ar ôl ei berfformiad siomedig yn eryn Hwngari yn y safle.
Roeddwn yn falch, yn y pen draw, o weld Cymru'n gorffen y gêm â phwynt, cystal oedd perfformiad y tîm cartref, ac er ei fod yn ganlyniad siomedig, rwy'n siwr na fydd Baku yn le hawdd i unrhyw un o'r timau eraill ymweld ag ef.



Adroddiad BBC Cymru'r Byd