Blog Droed

Hynt a helynt ffan ffwtbol Cymraeg ...

Uchafbwyntiau HTV

25.8.04
Welodd unrhyw un uchafbwyntiau Cwpan Carling ar HTV neithiwr? Roedd o'n raglen drychinebus o wael.

Wedi treulio hanner awr a mwy o'r rhaglen yn dangos gêm Caerdydd yn erbyn Kidderminster, cawsom y goliau o QPR v Abertawe - a rhain wedi eu golygu'n uffernol o sâl.

Yna cawsom uchafbwyntiau'r gêm rhwng Hull a Wrecsam - mam bach, dyma chi shambles.
Pedair gôl wedi eu torri'n gythreilig o herciog ac yna troi at y ciciau o'r smotyn.

Ar ôl gweld y ddau dîm yn methu un cic ac yn sgorio un cic, cawsom glip o Darren Ferguson yn sgorio i Wrecsam i roi'r Dreigiau 2-1 ar y blaen ... yna, yn sydyn, roedd y boi smarmy o'r stiwdio yn awgrymu ein bod yn "keep it right here" gan ein bod am ddod yn ôl wedi'r hysbysebion i weld "all the action from Rotherham" ....????

Wel be am adael i ni weld gweddill y ciciau o'r smotyn o Hull, neu hyd yn oed dweud beth oedd y blydi sgôr!!!

Shambls llwyr a gwarth o beth.

Iraq 1-3 Paraguay

Dim diweddglo tylwyth teg i dîm pêl-droed Iraq, ond o leiaf mae nhw wedi codi ymwybyddiaeth pawb o bêl-droed, nid yn unig yn Iraq, ond yn y dwyrain canol yn gyffredinol.

Adroddiad ar BBC Cymru'r Byd

Roeddwn i wedi gobeithio ymweld â Thurkmenistan ar ôl bod yn Baku i wylio Cymru wythnos nesaf, ond yn anffodus nid oeddwn yn gallu cael visa - blinkin' passport Prydeinig
[nodyn i fi fy hun - mae'n hen bryd ceisio cael passport Gwyddelig, mae'n ddigon hawdd medde nhw ac yn eithaf handy mewn sefyllfaoedd fel hyn]

Mae Turkmenistan yn herio Saudi Arabia yn rowndiau rhagbrofol Asia ar gyfer Cwpan y Byd 2006 a'r cynllun oedd mynd o Baku i Turkmenbashi gyda fferi ar draws Môr y Caspian cyn hedfan draw i Ashgabat i wylio'r gêm.

Iraq v Paraguay

24.8.04
Wel stori'r Gemau Olympaidd i mi yw tîm pêl-droed Iraq. Mae'r tîm pêl-droed wedi synnu pawb yn y Gemau gan gyrraedd y rownd gynderfynol lle byddent yn herio Paraguay heno 'ma.
Mae disgwyl canoedd o Iraqiaid alltud i deithio i Thessaloniki i gefnogi'r tîm wrth iddynt geisio cyrraedd y gêm derfynol a herio'r Ariannin am y fedal aur fore Sadwrn.

Awê Iraq!

Stori gan wasanaeth newyddion Reuters

Meddwi'n racs yn Riga

21.8.04
Wel wir, lle mae dyn yn dechrau? Mae Riga yn ddinas hyfryd, yn ddinas brydferth ac mae'r merched sydd yn byw yno yn brydferthach byth!
Os yda chi'n cael cyfle i ymweld â'r ddinas, ewch rwan cyn i'r penwythnosau stag, sydd yn siwr o gyrraedd mewn un haid rwan bod Ryanair yn hedfan yno, sbwylio'r ddinas.
Mae Riga'n ddinas digon bychan fel eich bod yn gallu cerdded i unman, ond eto'n ddigon mawr i gynnig llu o fariau, clybiau nôs ac adloniant ... ahem ... amheus.
Roedd dros 450 o Gymry wedi teithio i Latfia - i ni'r anoraks roedd yn gyfle i rhoi tic yn erbyn gwlad arall - er mwyn gweld y gêm gyntaf erioed rhwng y ddwy wlad, a roedd yr awyrgylch yn y ddinas wrth edrych ymlaen at y gêm yn wych.
Roedd rhywfaint o siom nos Lun wrth i bedwar boi ifanc o Latfia ddewis ymosod ar ein criw ni o hogia mewn bar ger y prif sgwâr. Er bod yr heddlu wedi eu galw i'r bar gan y perchennog, llwyddodd y bois o Latfia i roi slap i nifer o'r hogia. Yn wir, roedd un plismon yn dal Cymro tra roedd un o'r hogia lleol yn ei ddyrnu.
I dorri stori hir yn fyr, es ddywed y Sais, cafodd un Cymro ei gymryd i gefn fan heddlu ac, ymhen ychydig oriau, cafodd ei hebrwng i ATM cyfagos a'i orfodi i dynnu 300 lat (tua £300) allan o'r peiriant - "dirwy" medda nhw ... set-up llwyr a llwgrwobrwyo byddwn i yn ei alw.
Beth bynnag, cawsom uffar o amser da am weddill y daith, yn enwedig ar ddiwrnod y gêm wedi i ni dod o hyd i far bach ger y stadiwm oedd yn edrych fel parlwr ffrynt y ddynes tu ôl i'r bar!
Wedi gofyn am vodka a Sprite, cefais dri chwarter gwydr o vodka cyn iddi nôl y botel Sprite a sylwi ei fod yn wag - "No worry, I give more vodka to you ...", meddai! Does dim angen dweud nad ydw i'n cofio rhyw lawer o'r gêm!

Lluniau'r daith i Riga

Adroddiad BBC Cymru'r Byd

Latfia 0-2 Cymru

20.8.04
Trip gwych i ddinas anhygoel o brydferth ac i goroni'r cyfan cawsom fuddugoliaeth haeddianol!
Wedi cyrraedd adref am hanner nôs neithiwr/bore 'ma a hynny wedi treulio nos Fercher mewn clwb nôs a chasino - cyrhaeddodd tri ohonnom y gwesty am 8 o'r gloch fore Iau er mwyn cael brecwast a mynd i'r gwely am ddwy awr - rwyf braidd yn flinedig heddiw, felly bydd rhaid i chi ddisgwyl tan yfory am y straeon a'r llyniau!

Latfia fory

15.8.04
Fydd na'm blogio am ychydig ddyddiau - dwi'n mynd i Latfia i wylio gêm gyfeillgar Cymru.

Hwyl am y tro ...

Tymor yn dechrau heddiw ...?

14.8.04
Mae'r tymor yn dechrau heddiw yn ôl bron pob papur newydd ... my arse! Mae Wrecsam eisoes wedi chwarae dwy gêm yn y gynghrair ac yn chwarae eu trydydd gêm heddiw.
Efallai bod y chwaraewyr rhyngwladol namby pamby sydd yn gyrru Ferrari ac yn chwarae i rhyw PLC United yn dechrau heddiw, ond mae'r pêl-droed go iawn wedi dechrau ers wythnos!

Achub y Cae Ras

11.8.04
Mae yna argyfwng yng Nhglwb Pêl-droed Wrecsam oherwydd y perchennog, Alex Hamilton.

Datblygwr tir yw Mr Hamilton ac mae o, gan ddefnyddio ei wahanol gwmniau, wedi llwyddo i brynu, nid yn unig y clwb ond y maes hanesyddol ac, yn bwysicach fyth, y lês ar gyfer y maes.

Mae CPD Wrecsam bellach yn berchen i gwmni o'r enw Memorvale, sydd yn berchen i gwmni arall o'r enw Broadhill.
Mae'r unig cyfranddaliad yn Broadhill yn berchen i Mr Alex Hamilton.

Yda chi dal efo fi ...?

Rhyw bryd yn 2002, llwyddodd cwmni o'r enw Damens i brynu 'freehold' Y Cae Ras ac yna yn 2003, er mwyn "codi arian i dalu bil treth", gwerthodd CPD Wrecsam lês y cae i gwmni Damens am £300,000.

Allwch chi ddyfalu pwy sydd berchen Damens?
Ia ... cywir ... Mr Alex Hamilton.

Felly wrth honni ei fod yn ceisio achu y clwb trwy godi arian i dalu'r dyn treth, fe werthodd Mr Hamilton lês y clwb iddo ei hun am £300,000 - er fod y bil treth yn £525,000 - ac yn waeth na hynny, bellach mae'n rhaid i'r clwb dalu £30,000 y flwyddyn mewn rent i Damens.

Cyn gwerthu'r lês roedd y clwb yn talu £1 y flwyddyn ... ia £1!!

Mae Mr Hamilton yn honni mai symud o'r Cae Ras yw'r unig ffordd i glirio dyled y clwb a dechrau â llechen lân - yr hyn mae'n anghofio ddweud yw ei fod yn debygol o wneud elw o hyd at £78 miliwn os yw'n cael ei ffordd ei hun ac yn llwyddo i godi tai ar safle.

Mae Ymddiriedolaeth Cefnogwyr Wrecsam wedi datgelu cynlluniau fyddai'n gweld y clwb yn clirio'r ddyled o £2.6m gan ddatblygu'r tir tu ôl i'r Kop i adeiladu fflatiau.
Byddai'r cynllun yma yn gweld y ddyled yn diflannu a galluogi'r clwb i aros ar Y Cae Ras.

Felly beth yw'r broblem medde chi?

Mr Hamilton yw'r broblem a'r mater bach o'i £78 miliwn ... nid achub y clwb yw ei fwriad on gwneud elw anhygoel.



Y cefngwyr yn protestio yn erbyn cynlluniau Mr Hamilton cyn y gêm â Swindon

Oldham 2-3 Wrecsam

10.8.04
Methu mynd i Boundary Park heno 'ma, felly'n gorfod bodloni ar Radio Wales ... neu dyna oedd y cynllun.
Roedd Rado Wales yn cael "problemau technegol", felly Ceefax a nodyn bodyn (text message) gan y clwb oedd yn dwyn fy sylw!

Hat-trick i Hector Sam, ond gyda gêm oddi cartref yn Brentford ddydd Sadwrn, a finnau'n defnyddio'r Brownie Points i fynd i Latfia ddydd Llun, ymddengys fy mod am fethu'r dair gêm agoriadol o'r tymor.

Wrecsam 2-1 Swindon

7.8.04
Blydi typical!
Diwrnod cyntaf y tymor yw'r diwrnod gorau o'r flwyddyn.
Pawb yn llawn gobaith, pawb yn llawn cyffro.
Tywydd braf yn caniatau pobl i wylio'r gêm yn eu crysau.
Cyfarfod wynebau cyfarwydd am y tro cyntaf ers mis Mai.
Y gwair wedi ei dorri'n fyr a'r maes yn edrych yn berffaith.
Clywed 'Gwyr Harlech' am y tro cyntaf ers wythnosau ...

A lle oeddwn i ...?


... styc yn y blydi swyddfa.

Ac i wneud pethau'n waeth roedd gorymdaith trwy'r dref yn Wrecsam heddiw er mwyn dangos gwrthwynebiad i gynllun y cadeirydd i symud y clwb o'r Cae Ras.
Roedd tua 3,000 o bobl ar y daith gerdded o swyddfeydd y cyngor i fyny at Y Cae Ras ac i goroni brynhawn perffaith cafwyd buddugoliaeth perffaith dros un o ffefrynau'r adran.

O Amgylch yr Alban

3.8.04
Wedi sôn am yr Highland League y diwrnod o'r blaen nes i glywed sôn am y bedwar boi fu yn teithio o amgylch y 42 o feysydd yng Nghynghrair yr Alban mewn 24 awr.

Llwyddodd y pedwar i deithio o Berwick Rangers i Ross County mewn 22 awr a 36 munud.

Mae stori yn adrodd eu hanes ar wefan rhaglen Ar y Marc:
O Berwick i Ross County
Ac mae gan y bechgyn wefan ddwy ieithog eu hunain hefyd:
http://www.scots42tour.co.uk/

Dwi'n cofio gweld Dylan Ebenezer yn teithio o amgylch meysydd Cynghrair Cymru unwaith ar raglen Gôl ar S4C, ond 'sgwn i faint fydai'n gymryd go iawn i fynd o amgylch y 18 maes?